ਸੋਕੇ ਲਈ ਤਿਆਰੀ ਅਤੇ ਜਵਾਬੀ ਪ੍ਰਤਿਕਿਰਿਆ
Last updated on June 4, 2026ਬੀ.ਸੀ. ਹੁਣ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਸੋਕੇ ਦੌਰਾਨ ਲੋਕਾਂ ਅਤੇ ਭਾਈਚਾਰਿਆਂ ਨੂੰ ਸੁਰੱਖਿਅਤ ਰੱਖਣ ਲਈ ਕੰਮ ਕਰ ਰਿਹਾ ਹੈ।
English | 繁體中文 | 简体中文 | Français | ਪੰਜਾਬੀ
ਸਭ ਤੋਂ ਤਾਜ਼ਾ ਜਾਣਕਾਰੀ ਲਈ, ਕਿਰਪਾ ਕਰਕੇ ਅੰਗਰੇਜ਼ੀ ਪੰਨੇ ‘ਤੇ ਜਾਓ
ਇਸ ਪੰਨੇ 'ਤੇ
ਬੀ.ਸੀ. ਵਿੱਚ ਸੋਕੇ ਬਾਰੇ ਜਾਣਕਾਰੀ
ਆਉਣ ਵਾਲੇ ਸਾਲਾਂ ਵਿੱਚ ਸੋਕੇ ਦੇ ਲਗਾਤਾਰ ਇੱਕ ਚਿੰਤਾ ਦਾ ਮੁੱਦਾ ਬਣੇ ਰਹਿਣ ਦੀ ਸੰਭਾਵਨਾ ਹੈ। ਬੀ.ਸੀ. ਦੇ ਕੁਝ ਹਿੱਸਿਆਂ ਵਿੱਚ ਆਮ ਨਾਲੋਂ ਘੱਟ ਮੀਂਹ ਅਤੇ ਬਰਫ਼ ਪੈਣੀ ਜਾਰੀ ਹੈ, ਅਤੇ ਇਸ ਦਾ ਪਾਣੀ ਦੇ ਪੱਧਰਾਂ ‘ਤੇ ਲੰਬੇ ਸਮੇਂ ਤੱਕ ਦਾ ਅਸਰ ਪੈ ਰਿਹਾ ਹੈ।
ਸੋਕਾ ਹੁੰਦਾ ਰਹਿੰਦਾ ਹੈ। ਪਰ ਪਾਣੀ ਦੀ ਕਮੀ ਹੋਣੀ ਲਾਜ਼ਮੀ ਨਹੀਂ। ਹਰ ਕੋਈ ਪਾਣੀ ਬਚਾਉਣ ਵਿੱਚ ਯੋਗਦਾਨ ਪਾ ਸਕਦਾ ਹੈ। ਜਦੋਂ ਅਸੀਂ ਇਹ ਸਭ ਮਿਲ ਕੇ ਕਰਦੇ ਹਾਂ, ਤਾਂ ਛੋਟੇ ਬਦਲਾਅ ਵੱਡਾ ਅੰਤਰ ਪੈਦਾ ਕਰਦੇ ਹਨ।
ਸੋਕਾ ਕੀ ਹੈ
ਸੋਕਾ ਇੱਕ ਇਹੋ ਜਿਹਾ ਸਮਾਂ ਹੁੰਦਾ ਹੈ ਜਿਸ ਵਿੱਚ ਲੰਮੇਂ ਅਰਸੇ ਲਈ ਆਮ ਤੋਂ ਘੱਟ ਬਾਰਸ਼ ਜਾਂ ਬਰਫਬਾਰੀ ਹੁੰਦੀ ਹੈ ਜਿਸ ਦੇ ਨਤੀਜੇ ਵਜੋਂ ਪਾਣੀ ਦੀ ਕਮੀ ਹੋ ਸਕਦੀ ਹੈ। ਇਹ ਉਸ ਪਾਣੀ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ ਜਿਸਦੀ ਸਾਨੂੰ ਪੀਣ, ਸਾਡਾ ਭੋਜਨ ਉਗਾਉਣ ਅਤੇ ਸਾਡੀਆਂ ਮੱਛੀਆਂ, ਜਾਨਵਰਾਂ ਅਤੇ ਵਾਤਾਵਰਨ ਨੂੰ ਸਿਹਤਮੰਦ ਰੱਖਣ ਲਈ ਲੋੜ ਹੈ।
ਪਾਣੀ ਦੀ ਕਮੀ ਕੀ ਹੁੰਦੀ ਹੈ
ਪਾਣੀ ਦੀ ਕਮੀ ਦਾ ਮਤਲਬ ਹੈ ਕਿ ਲੋਕਾਂ ਜਾਂ ਵਾਤਾਵਰਨ ਪ੍ਰਣਾਲੀਆਂ ਦੀਆਂ ਲੋੜਾਂ ਨੂੰ ਪੂਰਾ ਕਰਨ ਲਈ ਕਾਫ਼ੀ ਪਾਣੀ ਉਪਲਬਧ ਨਹੀਂ ਹੈ। ਇਹ ਸੋਕੇ ਕਾਰਨ ਜਾਂ ਉਸ ਤੋਂ ਬਿਨਾਂ ਵੀ ਹੋ ਸਕਦੀ ਹੈ, ਅਤੇ ਇਸ ‘ਤੇ ਇਸ ਗੱਲ ਦਾ ਵੀ ਅਸਰ ਹੁੰਦਾ ਹੈ ਕਿ ਅਸੀਂ ਕਿੰਨਾ ਪਾਣੀ ਵਰਤਦੇ ਹਾਂ। ਅਸੀਂ ਸੋਕੇ ਨੂੰ ਰੋਕ ਨਹੀਂ ਸਕਦੇ, ਪਰ ਅਸੀਂ ਘੱਟ ਪਾਣੀ ਵਰਤ ਕੇ ਪਾਣੀ ਦੀ ਕਮੀ ਨੂੰ ਰੋਕਣ ਵਿੱਚ ਮਦਦ ਕਰ ਸਕਦੇ ਹਾਂ।
ਸਥਾਨਕ ਪਰਿਸਥਿਤੀਆਂ
ਕਿਸੇ ਖੇਤਰ ਦੇ ਭਾਈਚਾਰੇ ਪਾਣੀ ਦੀ ਸਪਲਾਈ ਅਤੇ ਮੰਗ ਦੇ ਅਧਾਰ ‘ਤੇ ਸੋਕੇ ਨਾਲ ਵੱਖ-ਵੱਖ ਤਰੀਕਿਆਂ ਨਾਲ ਪ੍ਰਭਾਵਤ ਹੋ ਸਕਦੇ ਹਨ। ਘੱਟ ਸੋਕੇ ਦੇ ਪੱਧਰ ਵਾਲੇ ਕਿਸੇ ਭਾਈਚਾਰੇ ਨੂੰ ਵੀ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਜੇਕਰ ਉੱਥੇ ਪਾਣੀ ਦੀ ਸਪਲਾਈ ਘੱਟ ਹੈ।
ਸੋਕੇ ਦੀ ਜਾਣਕਾਰੀ ਲਈ ਪੋਰਟਲ
ਸੋਕੇ ਦੇ ਪੱਧਰ ਨੂੰ 0 ਤੋਂ 5 ਪੈਮਾਨੇ ਦੀ ਵਰਤੋਂ ਕਰਕੇ ਮਾਪਿਆ ਜਾਂਦਾ ਹੈ, ਜਿਸ ਵਿੱਚ 0 ਦਾ ਮਤਲਬ ਕੋਈ ਸੋਕਾ ਨਹੀਂ ਅਤੇ 5 ਸੋਕੇ ਦੀ ਸਭ ਤੋਂ ਗੰਭੀਰ ਸਥਿਤੀ ਹੁੰਦੀ ਹੈ। ਸੋਕੇ ਦੇ ਪੱਧਰ ਇਹ ਦੱਸਦੇ ਹਨ ਕਿ ਹਰ ਖੇਤਰ ਵਿੱਚ ਮੌਸਮੀ ਹਾਲਾਤ ਕਿੰਨੇ ਸੁੱਕੇ ਹਨ – ਇਹ ਨਹੀਂ ਕਿ ਪਾਣੀ ਦੀ ਕਮੀ ਹੋ ਰਹੀ ਹੈ ਜਾਂ ਨਹੀਂ। ਇੱਕੋ ਹੀ ਖੇਤਰ ਅੰਦਰ ਵੀ ਵੱਖ-ਵੱਖ ਭਾਈਚਾਰਿਆਂ ਵਿੱਚ ਪਾਣੀ ਦੀ ਸਪਲਾਈ ਵਿੱਚ ਫਰਕ ਹੋ ਸਕਦਾ ਹੈ।
ਪਾਣੀ ਦੀ ਕਮੀ ਦੇ ਪੱਧਰਾਂ ਲਈ ਇੱਕ ਨਵਾਂ ਸਿਸਟਮ ਵੀ ਕੁਝ ਖੇਤਰਾਂ ਵਿੱਚ ਪਾਇਲਟ ਦੇ ਤੌਰ ’ਤੇ ਲਾਗੂ ਕੀਤਾ ਜਾ ਰਿਹਾ ਹੈ। ਇਹ ਘੱਟ, ਦਰਮਿਆਨਾ ਅਤੇ ਉੱਚ ਦੇ ਸਧਾਰਣ ਪੈਮਾਨੇ ਦੀ ਵਰਤੋਂ ਕਰਦਾ ਹੈ, ਤਾਂ ਜੋ ਵਾਟਰਸ਼ੈੱਡ ਵਿੱਚ ਪਾਣੀ ਦੀ ਕਮੀ ਦੇ ਖਤਰੇ ਨੂੰ ਦਰਸਾਇਆ ਜਾ ਸਕੇ। ਇਸ ਨਾਲ ਜਾਗਰੂਕਤਾ ਵਧਦੀ ਹੈ ਅਤੇ ਇਹ ਸਵੈੱਛਿਕ ਕਾਰਵਾਈ ਨੂੰ ਉਤਸ਼ਾਹਿਤ ਕਰਦਾ ਹੈ, ਤਾਂ ਜੋ ਪਾਣੀ ਦੀ ਕਮੀ ਹੋਣ ਨੂੰ ਰੋਕਿਆ ਜਾ ਸਕੇ ਜਾਂ ਇਸ ਦੇ ਪ੍ਰਭਾਵ ਨੂੰ ਘਟਾਇਆ ਜਾ ਸਕੇ।
ਸੋਕੇ ਬਾਰੇ ਜਾਣਕਾਰੀ ਦਾ ਪੋਰਟਲ ਇਨ੍ਹਾਂ ਪੱਧਰਾਂ ਦੀ ਵਰਤੋਂ ਕਰਕੇ ਹਰ ਖੇਤਰ ਵਿੱਚ ਮੌਜੂਦਾ ਹਾਲਤਾਂ ਨੂੰ ਦਰਸਾਉਂਦਾ ਹੈ। ਇਸਨੂੰ ਸੋਕੇ ਦੇ ਮੌਸਮ ਦੌਰਾਨ ਹਰ ਵੀਰਵਾਰ ਅੱਪਡੇਟ ਕੀਤਾ ਜਾਂਦਾ ਹੈ।
- ਸੋਕੇ ਅਤੇ ਪਾਣੀ ਦੀ ਕਮੀ ਸੰਬੰਧੀ ਹਫ਼ਤਾਵਰੀ ਬੁਲੇਟਿਨ ਪੜ੍ਹੋ
- ਹੇਠਾਂ ਇੰਟਰਐਕਟਿਵ ਨਕਸ਼ਾ ਦੇਖੋ ਜਾਂ ਵਿਸਤ੍ਰਿਤ ਜਾਣਕਾਰੀ ਲਈ ਪੂਰੀ ਸਾਈਟ 'ਤੇ ਜਾਓ।
ਸੋਕੇ ਲਈ ਤਿਆਰੀ
ਅਸੀਂ ਹੁਣ ਸੋਕੇ ਲਈ ਤਿਆਰ ਹੋਣ ਵਿੱਚ ਹਰ ਕਿਸੇ ਦੀ ਮਦਦ ਕਰ ਰਹੇ ਹਾਂ, ਤਾਂ ਜੋ ਅਸੀਂ ਇਸ ਨੂੰ ਜਲਦੀ ਸੰਬੋਧਿਤ ਕਰ ਸਕੀਏ, ਹੋਰ ਤੇਜ਼ੀ ਨਾਲ ਰਿਕਵਰ ਹੋ ਸਕੀਏ, ਅਤੇ ਭਵਿੱਖ ਲਈ ਵਧੇਰੇ ਤਿਆਰ ਹੋ ਸਕੀਏ।
ਤੁਸੀਂ ਕੀ ਕਰ ਸਕਦੇ ਹੋ
ਤੁਸੀਂ ਘਰ ਵਿੱਚ ਘੱਟ ਪਾਣੀ ਦੀ ਵਰਤੋਂ ਕਰਨ ਲਈ ਛੋਟੀਆਂ ਤਬਦੀਲੀਆਂ ਕਰਕੇ ਮਦਦ ਕਰ ਸਕਦੇ ਹੋ। ਜੇ ਤੁਸੀਂ ਕਰ ਸਕਦੇ ਹੋ, ਤਾਂ ਤੁਸੀਂ ਅਜਿਹੇ ਯਾਰਡ ਵੀ ਲਗਾ ਸਕਦੇ ਹੋ ਜਿਨ੍ਹਾਂ ਨੂੰ ਜ਼ਿਆਦਾ ਪਾਣੀ ਦੀ ਲੋੜ ਨਹੀਂ ਹੁੰਦੀ (drought resistant yards), ਪਾਣੀ ਬਚਾਉਣ ਵਾਲੇ ਨਲ, ਟੌਇਲੈਟ ਅਤੇ ਵਾਸ਼ਰ ਵਿੱਚ ਨਿਵੇਸ਼ ਕਰ ਸਕਦੇ ਹੋ, ਜਾਂ ਮੀਂਹ ਦਾ ਪਾਣੀ ਇਕੱਠਾ ਕਰ ਸਕਦੇ ਹੋ - ਬਹੁਤ ਸਾਰੇ ਭਾਈਚਾਰੇ ਛੋਟ ਦੀ ਪੇਸ਼ਕਸ਼ ਕਰਦੇ ਹਨ।
ਕਿਸਾਨ ਅਤੇ ਭੋਜਨ ਉਤਪਾਦਕ
ਅਸੀਂ ਕਿਸਾਨਾਂ ਨੂੰ ਭੋਜਨ ਅਤੇ ਜਾਨਵਰਾਂ ਲਈ ਖੇਤਾਂ ਵਿੱਚ ਪਾਣੀ ਸਟੋਰ ਕਰਨ ਲਈ ਬਿਹਤਰ ਬੁਨਿਆਦੀ ਢਾਂਚਾ ਬਣਾਉਣ ਵਿੱਚ ਮਦਦ ਕਰ ਰਹੇ ਹਾਂ, ਫਸਲਾਂ ਨੂੰ ਜਲਵਾਯੂ ਤਬਦੀਲੀ ਲਈ ਵਧੇਰੇ ਮਜ਼ਬੂਤ ਅਤੇ ਪਾਣੀ ਦੀ ਬਚਤ ਕਰ ਰਹੇ ਹਾਂ, ਅਤੇ ਲੋੜ ਪੈਣ 'ਤੇ ਵਿੱਤੀ ਸਹਾਇਤਾ ਅਤੇ ਸਰੋਤ ਪ੍ਰਦਾਨ ਕਰ ਰਹੇ ਹਾਂ।
ਭਾਈਚਾਰੇ ਅਤੇ ਫਰਸਟ ਨੇਸ਼ਨਸ
ਅਸੀਂ ਝੀਲਾਂ ਅਤੇ ਨਦੀਆਂ ਵਿੱਚ ਪਾਣੀ ਦੇ ਪੱਧਰ ਦਾ ਪ੍ਰਬੰਧਨ ਕਰਨ, ਪੀਣ ਵਾਲੇ ਪਾਣੀ ਦੇ ਸਿਸਟਮ ਵਿੱਚ ਸੁਧਾਰ ਕਰਨ ਅਤੇ ਜਾਨਵਰਾਂ, ਮੱਛੀਆਂ ਅਤੇ ਵਾਟਰਸ਼ੈਡਾਂ ਨੂੰ ਤੰਦਰੁਸਤ ਰੱਖਣ ਲਈ ਬਿਹਤਰ ਬੁਨਿਆਦੀ ਢਾਂਚੇ ਦਾ ਨਿਰਮਾਣ ਕਰਕੇ ਇਹ ਯਕੀਨੀ ਬਣਾ ਰਹੇ ਹਾਂ ਕਿ ਲੋਕਾਂ ਨੂੰ ਲੋੜੀਂਦਾ ਪਾਣੀ ਮਿਲੇ।
ਸੋਕੇ ਦੌਰਾਨ ਪਾਣੀ ਦੀ ਬੱਚਤ
ਪਾਣੀ ਸਾਡੇ ਸਾਰਿਆਂ ਲਈ ਮਹੱਤਵਪੂਰਨ ਹੈ। ਇਸ ਲਈ ਸੋਕੇ ਅਤੇ ਪਾਣੀ ਦੀ ਕਮੀ ਨਾਲ ਨਜਿੱਠਣਾ ਇੱਕ ਸਾਂਝੀ ਜ਼ੁੰਮੇਵਾਰੀ ਹੈ। ਜੇ ਪਾਣੀ ਦੀ ਕਮੀ ਹੁੰਦੀ ਹੈ, ਤਾਂ ਇਹ ਯਕੀਨੀ ਬਣਾਉਣ ਲਈ ਪਾਬੰਦੀਆਂ ਦੀ ਲੋੜ ਹੋ ਸਕਦੀ ਹੈ ਕਿ ਹਰ ਕਿਸੇ ਨੂੰ ਲੋੜੀਂਦਾ ਪਾਣੀ ਮਿਲੇ। ਬਹੁਤ ਸਾਰੇ ਕਿਸਾਨ ਅਤੇ ਉਦਯੋਗ ਪਹਿਲਾਂ ਹੀ ਘੱਟ ਪਾਣੀ ਦੀ ਵਰਤੋਂ ਕਰਨ ਲਈ ਕਾਰਵਾਈ ਕਰ ਰਹੇ ਹਨ।
ਪਾਣੀ ਦੀ ਸਵੈ-ਇੱਛਤ ਸੰਭਾਲ
ਜੇ ਕਾਰਵਾਈ ਦੀ ਲੋੜ ਪਵੇ, ਤਾਂ ਸਾਡਾ ਪਹਿਲਾ ਕਦਮ ਹਰ ਕਿਸੇ ਨੂੰ ਸਵੈ-ਇੱਛਾ ਨਾਲ ਪਾਣੀ ਬਚਾਉਣ ਵਿੱਚ ਮਦਦ ਕਰਨ ਲਈ ਉਤਸ਼ਾਹਿਤ ਕਰਨਾ ਹੈ। ਜਦੋਂ ਅਸੀਂ ਕਈ ਛੋਟੀਆਂ ਤਬਦੀਲੀਆਂ ਇਕੱਠੇ ਕਰਦੇ ਹਾਂ ਤਾਂ ਉਹ ਇੱਕ ਵੱਡਾ ਫਰਕ ਲਿਆਉਂਦੀਆਂ ਹਨ - ਅਤੇ ਇਹ ਪਾਣੀ ਦੀਆਂ ਪਾਬੰਦੀਆਂ ਦੀ ਜ਼ਰੂਰਤ ਨੂੰ ਰੋਕ ਸਕਦਾ ਹੈ।
ਪਾਣੀ ਦੀਆਂ ਸਥਾਨਕ ਪਾਬੰਦੀਆਂ
ਜੇ ਤੁਹਾਡੇ ਭਾਈਚਾਰੇ ਵਿੱਚ ਪਾਣੀ ਦੀ ਸਪਲਾਈ ਅਤੇ ਮੰਗ ਦਾ ਪ੍ਰਬੰਧਨ ਕਰਨ ਲਈ ਅਗਲੀ ਕਾਰਵਾਈ ਦੀ ਲੋੜ ਪੈਂਦੀ ਹੈ ਤਾਂ ਤੁਹਾਡੀ ਸਥਾਨਕ ਸਰਕਾਰ ਜਾਂ ਫਰਸਟ ਨੇਸ਼ਨ ਸਥਾਨਕ ਪਾਣੀ ਦੀਆਂ ਪਾਬੰਦੀਆਂ ਜਾਰੀ ਕਰ ਸਕਦੇ ਹਨ। ਤੁਸੀਂ ਕਦੋਂ ਲਾਅਨ ਨੂੰ ਪਾਣੀ ਦੇ ਸਕਦੇ ਹੋ, ਕਾਰਾਂ ਧੋ ਸਕਦੇ ਹੋ ਜਾਂ ਵਾਸ਼ਰ ਦੀ ਵਰਤੋਂ ਕਰ ਸਕਦੇ ਹੋ, ਇਹ ਇਸ ਨੂੰ ਸੀਮਤ ਕਰ ਸਕਦਾ ਹੈ ਜਾਂ ਪਾਬੰਦੀ ਲਾ ਸਕਦਾ ਹੈ।
ਅਸਥਾਈ ਸੁਰੱਖਿਆ ਆਦੇਸ਼ (Temporary Protection Orders)
ਪਾਣੀ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਕਨੂੰਨੀ ਤੌਰ 'ਤੇ ਪਾਣੀ ਦੀ ਵਰਤੋਂ ਨੂੰ ਘਟਾਉਣ ਜਾਂ ਰੋਕਣ ਦੀ ਲੋੜ ਪੈ ਸਕਦੀ ਹੈ। ਜੇਕਰ ਪਾਣੀ ਦੇ ਵਹਾਅ ਨੂੰ ਬਹਾਲ ਕਰਨ ਅਤੇ ਜੋਖਮ ਵਾਲੀਆਂ ਮੱਛੀਆਂ ਅਤੇ ਵਾਟਰਸ਼ੈਡਾਂ ਨੂੰ ਲੰਬੇ ਸਮੇਂ ਤੱਕ ਹੋਣ ਵਾਲੇ, ਨਾ ਬਦਲਣਯੋਗ ਨੁਕਸਾਨ ਤੋਂ ਬਚਾਉਣ ਲਈ ਸਵੈ-ਇੱਛਤ ਯਤਨ ਕਾਫ਼ੀ ਨਹੀਂ ਹਨ, ਤਾਂ ਇਹ ਆਖਰੀ ਉਪਾਅ ਵਜੋਂ ਵਰਤਿਆ ਜਾਂਦਾ ਹੈ।
ਤੁਸੀਂ ਕੀ ਕਰ ਸਕਦੇ ਹੋ
ਹਰ ਕੋਈ ਘਰ, ਬਾਹਰ ਅਤੇ ਕੰਮ 'ਤੇ ਪਾਣੀ ਬਚਾਉਣ ਵਿੱਚ ਮਦਦ ਕਰ ਸਕਦਾ ਹੈ। ਛੋਟੀਆਂ ਤਬਦੀਲੀਆਂ ਉਦੋਂ ਇੱਕ ਵੱਡਾ ਫਰਕ ਲਿਆਉਂਦੀਆਂ ਹਨ ਜਦੋਂ ਅਸੀਂ ਉਨ੍ਹਾਂ ਨੂੰ ਇਕੱਠੇ ਕਰਦੇ ਹਾਂ। ਪਾਣੀ ਦੀ ਕਮੀ ਦੌਰਾਨ, ਪਾਣੀ ਦੀਆਂ ਸਥਾਨਕ ਪਾਬੰਦੀਆਂ ਦੀ ਪਾਲਣਾ ਕਰੋ।
ਘਰ ਦੇ ਅੰਦਰ ਪਾਣੀ ਦੀ ਬੱਚਤ ਲਈ ਸੁਝਾਅ
- ਘੱਟ ਸਮੇਂ ਲਈ ਸ਼ਾਵਰ ਲਓ (5 ਮਿੰਟ ਜਾਂ ਇਸ ਤੋਂ ਘੱਟ) - ਇਕ ਮਿੰਟ ਘੱਟ ਕਰਨ ਨਾਲ ਇੱਕ ਸਾਲ ਵਿੱਚ 2,700 ਲੀਟਰ ਤੱਕ ਦੀ ਬਚਤ ਹੁੰਦੀ ਹੈ
- ਦੰਦਾਂ ਨੂੰ ਬਰੱਸ਼ ਕਰਦੇ ਸਮੇਂ ਜਾਂ ਸ਼ੇਵਿੰਗ ਕਰਦੇ ਸਮੇਂ ਨਲ ਨੂੰ ਬੰਦ ਕਰੋ - ਇੱਕ ਸਾਲ ਵਿੱਚ 8,300 ਲੀਟਰ ਤੱਕ ਦੀ ਬਚਤ ਕਰੋ
- ਚੋਂਦੇ ਪਾਣੀ ਵਾਲੇ ਟੁਆਲਿਟ ਠੀਕ ਕਰੋ - ਪ੍ਰਤੀ ਸਾਲ 350,000 ਲੀਟਰ ਤੱਕ ਦੀ ਬਚਤ ਕਰੋ
- ਕਾਰ ਧੋਣ ਤੋਂ ਗੁਰੇਜ਼ ਕਰੋ - ਪ੍ਰਤੀ ਵਾਹਨ 260 ਲੀਟਰ ਤੱਕ ਦੀ ਬਚਤ ਕਰੋ
- ਕੱਪੜੇ ਧੋਣ ਦੌਰਾਨ ਪੂਰਾ ਲੋਡ ਚਲਾਓ - ਪ੍ਰਤੀ ਲੋਡ 200 ਲੀਟਰ ਤੱਕ ਦੀ ਬਚਤ ਕਰੋ
- ਜੇ ਹੱਥ ਨਾਲ ਭਾਂਡੇ ਧੋਣੇ ਹਨ ਤਾਂ ਸਿੰਕ ਨੂੰ ਭਰਕੇ ਧੋਵੋ
- ਨਲ ਨੂੰ ਲਗਾਤਾਰ ਚਲਾਉਣ ਦੀ ਬਜਾਏ ਫਰਿੱਜ ਵਿੱਚ ਠੰਡੇ ਪਾਣੀ ਦਾ ਇੱਕ ਜੱਗ ਰੱਖੋ
ਘਰ ਦੇ ਬਾਹਰ ਪਾਣੀ ਬਚਾਉਣ ਦੇ ਸੁਝਾਅ
- ਪਾਣੀ ਦੀਆਂ ਸਥਾਨਕ ਪਾਬੰਦੀਆਂ ਜਾਂ ਪਾਣੀ ਦੀ ਵਰਤੋਂ ਦੇ ਨਿਯਮਾਂ ਦੀ ਪਾਲਣਾ ਕਰੋ - ਬਹੁਤ ਸਾਰੇ ਖੇਤਰਾਂ ਵਿੱਚ ਪਹਿਲਾਂ ਹੀ ਬਾਹਰ ਪਾਣੀ ਦੀ ਵਰਤੋਂ ‘ਤੇ ਦੀਆਂ ਪਾਬੰਦੀਆਂ ਹਨ
- ਜੇ ਇਜਾਜ਼ਤ ਹੋਵੇ ਤਾਂ ਆਪਣੇ ਲਾਅਨ ਨੂੰ ਹਫ਼ਤੇ ‘ਚ ਇੱਕ ਵਾਰ ਹੀ ਪਾਣੀ ਦਿਓ - ਹਰ ਮਹੀਨੇ 37,600 ਲੀਟਰ ਦੀ ਬਚਤ ਕਰੋ
- ਲਾਅਨ ਨੂੰ ਪ੍ਰਤੀ ਹਫਤੇ ਸਿਰਫ 1 ਇੰਚ ਪਾਣੀ ਦੀ ਲੋੜ ਹੁੰਦੀ ਹੈ
- ਵਾਸ਼ਪੀਕਰਨ (evaporation) ਨੂੰ ਘਟਾਉਣ ਲਈ ਸਵੇਰੇ ਜਾਂ ਸ਼ਾਮ ਨੂੰ ਪਾਣੀ ਦਿਓ
- ਬਾਹਰੀ ਪੌਦਿਆਂ ਦੀ ਵਰਤੋਂ ਲਈ ਮੀਂਹ ਦਾ ਪਾਣੀ ਇਕੱਠਾ ਕਰੋ ਜਾਂ ਇਸਤੇਮਾਲ ਕੀਤੇ ਜਾ ਚੁੱਕੇ ਪਾਣੀ ਦੀ ਦੁਬਾਰਾ ਵਰਤੋਂ ਕਰੋ
- ਅਜਿਹੇ ਯਾਰਡ ਜਾਂ ਗਾਰਡਨ ਲਗਾਓ ਜਿਨ੍ਹਾਂ ਨੂੰ ਜ਼ਿਆਦਾ ਪਾਣੀ ਦੀ ਲੋੜ ਨਹੀਂ ਹੁੰਦੀ
- ਬਾਹਰ ਹੋਜ਼ ਦੀ ਬਜਾਏ ਝਾੜੂ ਨਾਲ ਸਫ਼ਾਈ ਕਰੋ
- ਲੀਕ ਲਈ ਸਾਰੀ ਪਲੰਬਿੰਗ ਅਤੇ ਹੋਜ਼ ਦੀ ਜਾਂਚ ਕਰੋ
- ਪਾਣੀ ਦੀ ਬੱਚਤ ਕਰਨ ਵਾਲੇ ਪੂਲ ਫਿਲਟਰ ਦੀ ਵਰਤੋਂ ਕਰੋ
ਕਾਰੋਬਾਰ ਅਤੇ ਉਦਯੋਗ ਦੇ ਪਾਣੀ ਦੀ ਬੱਚਤ ਲਈ ਸੁਝਾਅ
- ਫੌਲੋ ਕਰੋ:
- ਜ਼ਰੂਰੀ ਪਾਣੀ ਦੀ ਵਰਤੋਂ ਦੀ ਸਮੀਖਿਆ ਕਰੋ
- ਗੈਰ-ਜ਼ਰੂਰੀ ਪਾਣੀ ਦੀ ਵਰਤੋਂ ਨੂੰ ਘਟਾਓ
- ਪਾਣੀ ਦੀ ਬੱਚਤ ਲਈ ਪਾਣੀ ਦੇ ਸਿਸਟਮ ਦੀ ਵਧੀਆ ਢੰਗ ਨਾਲ ਵੱਧ ਤੋਂ ਵੱਧ ਵਰਤੋਂ ਕਰੋ
- ਉਦਯੋਗਿਕ (industrial) ਕੰਮਾਂ ਵਿੱਚ ਵਰਤੇ ਜਾਂਦੇ ਪਾਣੀ ਨੂੰ ਰੀਸਾਈਕਲ ਕਰੋ
- ਪਾਣੀ ਦੀ ਬੱਚਤ ਵਾਲੇ ਤਰੀਕਿਆਂ ਅਤੇ ਉਪਕਰਣਾਂ ਦੀ ਵਰਤੋਂ ਕਰੋ
- ਲੀਕ ਲਈ ਸਾਰੀ ਪਲੰਬਿੰਗ ਦੀ ਜਾਂਚ ਕਰੋ
- ਇਸਤੇਮਾਲ ਕੀਤੇ ਜਾ ਚੁੱਕੇ ਪਾਣੀ ਨਾਲ ਲੈਂਡਸਕੇਪਿੰਗ ਕਰੋ
- ਵਾਟਰ ਰੀਸਰਕੂਲੇਟਿੰਗ ਸਿਸਟਮ ਇੰਸਟਾਲ ਕਰੋ
- ਪਾਣੀ ਦਾ ਆਡਿਟ (ਪਾਣੀ ਕਿੱਥੇ ਅਤੇ ਕਿਵੇਂ ਇਸਤੇਮਾਲ ਹੋ ਰਿਹਾ ਹੈ, ਇਸ ਦੀ ਜਾਂਚ) ਕਰੋ
- ਪਾਣੀ ਦੀ ਵਰਤੋਂ ਦੀ ਨਿਗਰਾਨੀ ਕਰੋ
- ਪਾਣੀ ਦੀ ਬੱਚਤ ਦੀਆਂ ਨੀਤੀਆਂ ਲਾਗੂ ਕਰੋ
- ਲੋਅ ਫਲੋ (ਘੱਟ ਵਹਾਅ) ਡਿਵਾਈਸਾਂ ਨੂੰ ਇੰਸਟਾਲ ਕਰੋ
- ਉਦਯੋਗਿਕ ਵਰਤੋਂ ਲਈ ਪਾਣੀ ਦੀ ਸੰਭਾਲ ਕਰਨ ਵਾਲੇ ਫਿਕਸਚਰ ਨੂੰ ਅਪਗ੍ਰੇਡ ਕਰੋ
- ਉੱਚ-ਮਾਤਰਾ ਵਾਲੀਆਂ ਹੋਜ਼ ਨੂੰ ਉੱਚ-ਦਬਾਅ, ਘੱਟ-ਮਾਤਰਾ ਵਾਲੇ ਸਫਾਈ ਸਿਸਟਮ ਨਾਲ ਬਦਲੋ
- ਕਰਮਚਾਰੀਆਂ ਨੂੰ ਪਾਣੀ ਦੀ ਬੱਚਤ ਕਰਨ ਵਾਲੇ ਵਿਵਹਾਰ ਅਪਣਾਉਣ ਲਈ ਉਤਸ਼ਾਹਿਤ ਕਰੋ
ਸਵਾਲ ਪੁੱਛਣ ਅਤੇ ਪਾਣੀ ਦੇ ਲਾਇਸੈਂਸ ਬਾਰੇ ਜਾਂ ਅਸਥਾਈ ਸੁਰੱਖਿਆ ਆਦੇਸ਼ਾਂ ਬਾਰੇ ਹੋਰ ਜਾਣਕਾਰੀ ਲਈ, ਆਪਣੇ ਖੇਤਰ ਵਿੱਚ FrontCounter BC ਦਫਤਰ ਨਾਲ ਸੰਪਰਕ ਕਰੋ।
ਛੋਟਾਂ ਅਤੇ ਲਾਭ
ਬਹੁਤ ਸਾਰੇ ਭਾਈਚਾਰੇ ਲੋਕਾਂ ਨੂੰ ਪੈਸੇ ਬਚਾਉਣ ਅਤੇ ਘੱਟ ਪਾਣੀ ਦੀ ਵਰਤੋਂ ਕਰਨ ਵਿੱਚ ਮਦਦ ਕਰਨ ਲਈ ਛੋਟਾਂ ਜਾਂ ਲਾਭ ਦੀ ਪੇਸ਼ਕਸ਼ ਕਰਦੇ ਹਨ। ਜੇ ਤੁਸੀਂ ਯੋਗ ਹੋ, ਤਾਂ ਘੱਟ ਪਾਣੀ ਦੀ ਵਰਤੋਂ ਕਰਨ ਵਾਲੇ ਨਲ, ਟੌਇਲੈਟ ਅਤੇ ਵਾਸ਼ਰ ਦੀ ਵਰਤੋਂ ਕਰੋ; ਮੀਂਹ ਦੇ ਬੈਰਲ ਲਗਾਓ; ਅਤੇ ਸਿੰਚਾਈ, ਮਿੱਟੀ ਜਾਂ ਘੱਟ ਪਾਣੀ ਦੀ ਲੋੜ ਵਾਲੀ ਲੈਂਡਸਕੇਪਿੰਗ ਵਿੱਚ ਸੁਧਾਰ ਕਰੋ। ਵੇਰਵਿਆਂ ਲਈ ਆਪਣੀ ਕਮਿਊਨਿਟੀ ਤੋਂ ਜਾਣਕਾਰੀ ਲਓ ਜਾਂ ਹੇਠ ਦਿੱਤੀਆਂ ਛੋਟਾਂ ਦੀ ਸੂਚੀ ਦੀ ਸਮੀਖਿਆ ਕਰੋ।
ਸੂਬੇ ਭਰ ਵਿੱਚ
- ਬੀ ਸੀ ਹਾਈਡਰੋ ਆਮਦਨ ਯੋਗਤਾ ਪ੍ਰਾਪਤ ਪਰਿਵਾਰਾਂ ਲਈ ਐਨਰਜੀ ਸੇਵਿੰਗ ਕਿੱਟ (ਜਿਸ ਵਿੱਚ ਪਾਣੀ ਦੀ ਬੱਚਤ ਕਰਨ ਵਾਲੇ ਏਰੇਟਰ ਸ਼ਾਮਲ ਹਨ) ਅਤੇ ਮੁਫਤ ਪੋਰਟੇਬਲ ਏਅਰ ਕੰਡੀਸ਼ਨ ਪ੍ਰਦਾਨ ਕਰਦਾ ਹੈ
- ਹੀਟ ਪੰਪ ਵਾਟਰ ਹੀਟਰ ਛੋਟਾਂ ਵੀ ਪ੍ਰਦਾਨ ਕਰਦਾ ਹੈ
ਲੋਅਰ ਮੇਨਲੈਂਡ ਅਤੇ ਫਰੇਜ਼ਰ ਵੈਲੀ
ਐਬਟਸਫੋਰਡ ਅਤੇ ਮਿਸ਼ਨ
-
ਐਬਟਸਫੋਰਡ ਅਤੇ ਮਿਸ਼ਨ ਦੇ ਵਸਨੀਕ ਮੁਫ਼ਤ ਵਿੱਚ ਇੱਕ ਇਰੀਗੇਸ਼ਨ ਐਂਡ ਲੈਂਡਸਕੇਪ ਅਸੈਸਮੈਂਟ (ਸੀਂਚਾਈ ਅਤੇ ਲੈਂਡਸਕੇਪ ਮੁਲਾਂਕਣ) ਲੈ ਸਕਦੇ ਹਨ
ਸਿਟੀ ਔਫ ਚਿਲੀਵੈਕ
- ਸਿਟੀ ਔਫ ਚਿਲਿਵੈਕ ਆਪਣੇ ਨਿਵਾਸੀਆਂ ਨੂੰ ਕਈ ਇਨਸੈਂਟਿਵ ਦੀ ਪੇਸ਼ਕਸ਼ ਕਰਦੀ ਹੈ, ਜਿਸ ਵਿੱਚ ਅਗਲੀਐਸਟ ਲਾਅਨ ਕੌਨਟੈਸਟ, ਲੋ-ਫਲੋ ਟੌਇਲਟ ਰਿਬੇਟ, ਰੇਨ ਬੈਰਲ ਰਿਬੇਟ, ਅਤੇ ਬਾਹਰੀ ਪਾਣੀ ਦੀ ਸੰਭਾਲ ਲਈ ਸਬਸਿਡੀ ਵਾਲੀਆਂ ਕਿੱਟ ਸ਼ਾਮਲ ਹਨ
ਸਿਟੀ ਔਫ ਕੋਕੁਇਟਲਮ
- ਸਿਟੀ ਔਫ ਕੋਕੁਇਟਲਮ ਪਾਣੀ ਦੀ ਘੱਟ ਵਰਤੋਂ ਵਾਲੇ ਸਾਜ਼ੋ-ਸਮਾਨ ਨੂੰ ਘੱਟ ਕੀਮਤ ‘ਤੇ ਵੇਚਣ ਦੀ ਪੇਸ਼ਕਸ਼ ਕਰਦਾ ਹੈ ਜਿਵੇਂ ਕਿ ਮੀਂਹ ਦੇ ਬੈਰਲ ਅਤੇ ਇਲੈਕਟ੍ਰਿਕ ਵਾਟਰ ਟਾਈਮਰ ਅਤੇ ਟੌਇਲੈਟ ਅਪਗ੍ਰੇਡ ਕਰਨ ਲਈ ਰਿਬੇਟ ਟੈਕਸ ਕ੍ਰੈਡਿਟ ਪ੍ਰੋਗਰਾਮ
ਡੈਲਟਾ
- ਡੈਲਟਾ ਮੀਂਹ ਦੇ ਪਾਣੀ ਨੂੰ ਇਕੱਠਾ ਕਰਨ ਲਈ ਰੇਨ ਬੈਰਲ ਪ੍ਰੋਗਰਾਮ, ਪਾਣੀ ਬਚਾਉਣ ਵਾਲੀ ਕਿੱਟ, ਅਤੇ ਵਾਟਰ ਮੀਟਰ ਪ੍ਰੋਗਰਾਮ ਮੁਹੱਈਆ ਕਰਦਾ ਹੈ, ਜੋ ਇੱਕ ਸਧਾਰਣ ਫਲੈਟ ਰੇਟ ਫੀਸ ਦੀ ਬਜਾਇ ਇਸਤਿਮਾਲ ਅਨੁਸਾਰ ਭੁਗਤਾਨ ਪ੍ਰਣਾਲੀ ਨੂੰ ਉਤਸ਼ਾਹਿਤ ਕਰਦਾ ਹੈ, ਜਿਸ ਨਾਲ ਪਾਣੀ ਦੇ ਬਚਾਅ ਨੂੰ ਪ੍ਰੋਤਸਾਹਨ ਮਿਲਦਾ ਹੈ।
ਸਿਟੀ ਔਫ ਪੋਰਟ ਕੋਕੁਇਟਲਮ
- ਸਿਟੀ ਔਫ ਪੋਰਟ ਕੋਕੁਇਟਲਮ ਉਹਨਾਂ ਵਸਨੀਕਾਂ ਨੂੰ ਇਨਸੈਂਟਿਵ ਦੀ ਪੇਸ਼ਕਸ਼ ਕਰ ਰਹੀ ਹੈ ਜੋ ਆਪਣੇ ਲਾਅਨ ਨੂੰ ‘ਗੋਲਡਨ’ (ਪਾਣੀ ਨਾ ਦੇਣ ਕਾਰਨ ਘਾਹ ਦਾ ਸੁੱਕ ਕੇ ਸੁਨਿਹਰੇ ਰੰਗ ਦਾ ਹੋ ਜਾਣਾ) ਕਰ ਰਹੇ ਹਨ। ‘ਗੋਲਡਨ ਸਟ੍ਰੀਟ’ ਅਤੇ ਤਿੰਨ ‘ਗੋਲਡਨ ਲਾਅਨਜ਼’ ਲਈ ਇਨਾਮ ਵੀ ਮੁਹਈਆ ਕੀਤੇ ਗਏ ਹਨ।
ਮੇਪਲ ਰਿੱਜ
- ਮੇਪਲ ਰਿੱਜ ਵਿੱਚ ਘਰਾਂ ਦੇ ਮਾਲਕ ਆਪਣੇ ਘਰ ਵਿੱਚ ਪਾਣੀ ਦੀ ਘੱਟ ਵਰਤੋਂ ਵਾਲੇ ਟੌਇਲਟ ਲਗਵਾਉਣ ‘ਤੇ ਟੈਕਸ ਕ੍ਰੈਡਿਟ ਪ੍ਰਾਪਤ ਕਰ ਸਕਦੇ ਹਨ
ਰਿਚਮੰਡ
- ਲੋ-ਫਲੱਸ਼ ਟੌਇਲਟ ਲਗਵਾਉਣ ‘ਤੇ ਯੂਟਿਲਿਟੀ ਰਿਬੇਟ ਪ੍ਰਾਪਤ ਕਰ ਸਕਦੇ ਹਨ
ਨੌਰਦਰਨ ਬੀ.ਸੀ.
ਮਕੈਨਜ਼ੀ
- ਮਕੈਨਜ਼ੀ ਦੇ ਵਸਨੀਕ ਟੌਇਲਟ, ਵਾਸ਼ਿੰਗ-ਮਸ਼ੀਨਾਂ ਅਤੇ ਡਿਸ਼ਵਾਸ਼ਰਾਂ ਨੂੰ ਘੱਟ ਵਹਾਅ (ਲੋ-ਫਲੋ) ਅਤੇ ਵਧੇਰੇ ਕੁਸ਼ਲ ਹੋਣ ਲਈ ਅੱਪਗ੍ਰੇਡ ਕਰਨ ‘ਤੇ ਰਿਬੇਟ ਪ੍ਰਾਪਤ ਕਰ ਸਕਦੇ ਹਨ
ਪ੍ਰਿੰਸ ਜੌਰਜ
- ਪ੍ਰਿੰਸ ਜੌਰਜ ਦੇ ਨਿਵਾਸੀ ਵੌਲੰਟਰੀ ਰੈਜ਼ੀਡੈਨਸ਼ੀਅਲ ਵਾਟਰ ਮੀਟਰ ਪ੍ਰੋਗਰਾਮ ਲਈ ਸਾਈਨ ਅੱਪ ਕਰ ਸਕਦੇ ਹਨ ਜੋ ਉਹਨਾਂ ਨੂੰ ਪਾਣੀ ਦੀ ਵਰਤੋਂ ਨੂੰ ਸਹੀ ਤਰੀਕੇ ਨਾਲ ਟਰੈਕ ਕਰਨ, ਪਾਣੀ ਦਾ ਬਚਾਅ ਕਰਨ ਅਤੇ ਸਿਰਫ਼ ਉਹਨਾਂ ਦੁਆਰਾ ਵਰਤੇ ਗਏ ਪਾਣੀ ਲਈ ਹੀ ਭੁਗਤਾਨ ਕਰਕੇ ਪੈਸਿਆਂ ਦੀ ਬਚਤ ਕਰਵਾ ਸਕਦਾ ਹੈ।
ਵਿਲੀਅਮਜ਼ ਲੇਕ
- ਵਿਲੀਅਮਜ਼ ਲੇਕ ਟੌਇਲਟ, ਵਾਸ਼ਿੰਗ ਮਸ਼ੀਨਾਂ ਅਤੇ ਡਿਸ਼ਵਾਸ਼ਰਾਂ ਨੂੰ ਘੱਟ ਵਹਾਅ ਅਤੇ ਵਧੇਰੇ ਕੁਸ਼ਲ ਬਣਾਉਣ ਲਈ ਅਪਗ੍ਰੇਡ ਕਰਨ ਲਈ ਅਪਲਾਇਐਂਸ ਛੋਟਾਂ ਦੀ ਪੇਸ਼ਕਸ਼ ਕਰਦੀ ਹੈ
ਓਕਾਨਾਗਨ ਬੇਸਿਨ ਵਾਟਰ ਬੋਰਡ
ਥੌਮਪਸਨ ਓਕਨਾਗਨ
ਕਲੋਨਾ
-
ਸਿਟੀ ਔਫ ਕਲੋਨਾ ਦਾ ਸਮਾਰਟ ਵਾਟਰ ਪ੍ਰੋਗਰਾਮ ਸਿੰਗਲ-ਫੈਮਿਲੀ ਘਰਾਂ ਅਤੇ ਸਟ੍ਰੈਟਾ ਕੰਪਲੈਕਸਾਂ ਵਿੱਚ ਰਹਿਣ ਵਾਲੇ ਨਿਵਾਸੀਆਂ ਨੂੰ ਸਿੰਚਾਈ ਵਾਲੇ ਲੈਂਡਸਕੇਪ ਖੇਤਰਾਂ ਵਿੱਚ ਪਾਣੀ ਦੀ ਵਰਤੋਂ ਦੀ ਕਾਰਗੁਜ਼ਾਰੀ ਸੁਧਾਰਣ ਲਈ ਰੀਬੇਟ ਪ੍ਰਦਾਨ ਕਰਦਾ ਹੈ
ਪੀਚਲੈਂਡ
-
ਪੀਚਲੈਂਡ ਦੀ ਗ੍ਰੀਨ ਕ੍ਰੈਡਿਟਸ ਪਾਲਿਸੀ, ਅੱਧੇ ਤੋਂ ਦੋ ਏਕੜ ਦੇ ਵਿਚਕਾਰ ਪ੍ਰੌਪਰਟੀ ਦੀ ਸਿੰਚਾਈ ਕਰਨ ਵਾਲੇ ਭੋਜਨ ਉਤਪਾਦਕਾਂ ਨੂੰ ‘ਵਾਟਰ ਕੰਜ਼ੰਪਸ਼ਨ ਕੌਸਟ ਕ੍ਰੈਡਿਟ’ ਪ੍ਰਦਾਨ ਕਰਦੀ ਹੈ
ਵੈਨਕੂਵਰ ਆਇਲੈਂਡ ਅਤੇ ਸਨਸ਼ਾਈਨ ਕੋਸਟ
ਕੋਮੌਕਸ ਵੈਲੀ ਰੀਜਨਲ ਡਿਸਟ੍ਰਿਕਟ
-
ਕੋਮੌਕਸ ਵੈਲੀ ਰੀਜਨਲ ਡਿਸਟ੍ਰਿਕਟ ਦੇ ਵਾਟਰ ਕੰਜ਼ਰਵੇਸ਼ਨ ਰੀਬੇਟ ਉਨ੍ਹਾਂ ਪ੍ਰੌਪਰਟੀਆਂ ਲਈ ਉਪਲਬਧ ਹਨ ਜੋ ਕੋਮੌਕਸ ਵੈਲੀ ਵਾਟਰ ਸਿਸਟਮ ਨਾਲ ਜੁੜੀਆਂ ਹਨ, ਅਤੇ ਜਿੱਥੇ ਮਿੱਟੀ ਦੀ ਗੁਣਵੱਤਾ ਜਾਂ ਸਿੰਚਾਈ ਨਿਯੰਤਰਣ ਵਿੱਚ ਸੁਧਾਰ ਕੀਤੇ ਜਾਂਦੇ ਹਨ
ਰੀਜਨਲ ਡਿਸਟ੍ਰਿਕਟ ਔਫ ਨਨਾਇਮੋ
- ਰੀਜਨਲ ਡਿਸਟ੍ਰਿਕਟ ਔਫ ਨਨਾਇਮੋ ਦੇ ਵਾਟਰ ਕੰਜ਼ਰਵੇਸ਼ਨ ਰਿਬੇਟਸ ਸਿੰਚਾਈ ਦੇ ਅੱਪਗ੍ਰੇਡਾਂ, ਰੇਨ ਵਾਟਰ ਹਾਰਵੈਸਟਿੰਗ, ਵੈੱਲਹੈਡ ਅੱਪਗ੍ਰੇਡ, ਖੂਹ ਦੇ ਪਾਣੀ ਦੀ ਜਾਂਚ ਅਤੇ ਸੈਪਟਿਕ ਅੱਪਗ੍ਰੇਡਾਂ ਲਈ ਰਿਬੇਟ ਅਤੇ ਇਨਸੈਂਟਿਵ ਦੀ ਪੇਸ਼ਕਸ਼ ਕਰਦਾ ਹੈ
ਸਨਸ਼ਾਈਨ ਕੋਸਟ ਰੀਜਨਲ ਡਿਸਟ੍ਰਿਕਟ
- ਸਨਸ਼ਾਈਨ ਕੋਸਟ ਰੀਜਨਲ ਡਿਸਟ੍ਰਿਕਟ ਦਾ ਰੇਨਵਾਟਰ ਹਾਰਵੈਸਟਿੰਗ ਰਿਬੇਟ ਪ੍ਰੋਗਰਾਮ ਬਾਹਰੀ ਵਰਤੋਂ ਲਈ ਪਾਣੀ ਇਕੱਠਾ ਕਰਨ ਅਤੇ ਵਰਤਣ ਲਈ ਬਰਸਾਤੀ ਪਾਣੀ ਲਈ ਸਟੋਰੇਜ ਸਿਸਟਮ ਸਥਾਪਤ ਕਰਨ ਲਈ ਰਿਬੇਟ ਦੀ ਪੇਸ਼ਕਸ਼ ਕਰਦਾ ਹੈ।
ਸਿਟੀ ਔਫ ਕੈਂਪਬੈਲ ਰਿਵਰ
- ਸਿਟੀ ਔਫ ਕੈਂਪਬੈਲ ਰਿਵਰ ਵਾਟਰ ਕੰਜ਼ਰਵੇਸ਼ਨ ਰਿਬੇਟ ਇਨੀਸ਼ੀਏਟਿਵ ਟੌਇਲਟ, ਵਾਸ਼ਿੰਗ ਮਸ਼ੀਨਾਂ ਅਤੇ ਡਿਸ਼ਵਾਸ਼ਰਾਂ ਨੂੰ ਘੱਟ ਵਹਾਅ ਅਤੇ ਵਧੇਰੇ ਕੁਸ਼ਲ ਬਣਾਉਣ ਲਈ ਅਪਗ੍ਰੇਡ ਕਰਨ ਲਈ ਛੋਟਾਂ ਦੀ ਪੇਸ਼ਕਸ਼ ਕਰਦਾ ਹੈ
ਸਿਟੀ ਔਫ ਵਿਕਟੋਰੀਆ
- ਸਿਟੀ ਔਫ ਵਿਕਟੋਰੀਆ ਲੋਕਾਂ ਨੂੰ ਆਪਣੀ ਪ੍ਰੌਪਰਟੀ ‘ਤੇ ਬਰਸਾਤੀ ਪਾਣੀ ਦੀ ਕੁਸ਼ਲ ਵਰਤੋਂ ਲਈ ਰੇਨਵਾਟਰ ਰਿਵਾਰਡਜ਼ ਕ੍ਰੈਡਿਟ ਅਤੇ ਰਿਬੇਟਸ ਦੀ ਪੇਸ਼ਕਸ਼ ਕਰਦੀ ਹੈ
ਕੈਪਿਟਲ ਰੀਜਨਲ ਡਿਸਟ੍ਰਿਕਟ
- ਕੈਪਿਟਲ ਰੀਜਨਲ ਡਿਸਟ੍ਰਿਕਟ ਉਦਯੋਗਿਕ, ਵਪਾਰਕ ਜਾਂ ਸੰਸਥਾਗਤ ਕਾਰੋਬਾਰਾਂ ਲਈ ਰੀਬੇਟ ਪ੍ਰਦਾਨ ਕਰਦਾ ਹੈ, ਤਾਂ ਜੋ ਉਹ ‘ਵੰਸ-ਥਰੂ ਕੂਲਡ ਇਕੁਇਪਮੈਂਟ’ (ਏਅਰ ਕੰਡੀਸ਼ਨਰ, ਫ੍ਰਿਜ, ਕੂਲਰ ਅਤੇ ਆਈਸ ਮਸ਼ੀਨਾਂ) ਇੰਸਟਾਲ ਕਰ ਸਕਣ, ਸਾਰੇ ਹੱਥ ਧੋਣ ਵਾਲੇ ਸਿੰਕਾਂ ‘ਤੇ ਮੁਫ਼ਤ ਏਰੇਟਰ ਲਗਾ ਸਕਣ, ਅਤੇ ਮੁਫ਼ਤ ਪਾਣੀ ਦੀ ਵਰਤੋਂ ਅਤੇ ਕਾਰਗੁਜ਼ਾਰੀ ਆਡਿਟ ਪ੍ਰਾਪਤ ਕਰ ਸਕਣ
ਗੈਲੀਆਨੋ ਆਇਲੈਂਡ
- ਗੈਲੀਆਨੋ ਕੰਜ਼ਰਵੇਂਸੀ ਐਸੋਸੀਏਸ਼ਨ ਦਾ ਵਾਟਰ ਕੰਜ਼ਰਵੇਸ਼ਨ ਰਿਬੇਟ ਪ੍ਰੋਗਰਾਮ ਵਸਨੀਕਾਂ ਨੂੰ ਪਾਣੀ ਦੇ ਮੀਟਰਾਂ ਅਤੇ ਮੀਂਹ ਦੇ ਪਾਣੀ ਦੇ ਬੈਰਲਾਂ 'ਤੇ ਛੋਟ ਦੀ ਪੇਸ਼ਕਸ਼ ਕਰਦਾ ਹੈ
ਟਾਊਨ ਔਫ ਲੇਡੀਸਮਿਥ
- ਟਾਊਨ ਔਫ ਲੇਡੀਸਮਿਥ ਮੀਂਹ ਦੇ ਬੈਰਲ ਖਰੀਦਣ ਵਾਲੇ ਵਸਨੀਕਾਂ ਲਈ ਛੋਟਾਂ ਦੀ ਪੇਸ਼ਕਸ਼ ਕਰਦਾ ਹੈ
ਲੋਕਾਂ ਅਤੇ ਵਾਤਾਵਰਨ 'ਤੇ ਪ੍ਰਭਾਵ
ਮੱਛੀਆਂ ਅਤੇ ‘ਐਂਗਲਿੰਗ’ ‘ਤੇ ਸੀਮਾਵਾਂ
- ਸੋਕਾ ਘੱਟ ਵਹਾਅ ਅਤੇ ਗਰਮ ਪਾਣੀ ਦੀਆਂ ਪਰਿਸਥਿਤੀਆਂ ਦਾ ਕਾਰਨ ਬਣ ਸਕਦਾ ਹੈ। ਇਹ ਮੱਛੀਆਂ, ਖਾਸ ਕਰਕੇ ਠੰਡੇ ਪਾਣੀ ਦੀਆਂ ਕਿਸਮਾਂ ਜਿਵੇਂ ਕਿ ਟ੍ਰਾਊਟ, ਸੈਲਮਨ ਅਤੇ ਸਟੀਲਹੈਡ ਨੂੰ ਘੱਟ ਆਕਸੀਜਨ ਦੇ ਪੱਧਰ ਅਤੇ ਬਿਮਾਰੀ ਲਈ ਵਧੇਰੇ ਕਮਜ਼ੋਰ ਬਣਾਉਂਦਾ ਹੈ
- ਮੱਛੀਆਂ ਸਾਡੇ ਵਾਤਾਵਰਨ ਨੂੰ ਸਿਹਤਮੰਦ ਰੱਖਣ ਲਈ ਮਹੱਤਵਪੂਰਨ ਹਨ। ਮੱਛੀਆਂ ਬਹੁਤ ਸਾਰੇ ਇੰਡੀਜਨਸ ਲੋਕਾਂ ਲਈ ਮਹੱਤਵਪੂਰਨ ਸੱਭਿਆਚਾਰਕ ਮੁੱਲ ਵੀ ਰੱਖਦੀਆਂ ਹੈ ਅਤੇ ਬਹੁਤ ਸਾਰੇ ਭਾਈਚਾਰਿਆਂ ਲਈ ਭੋਜਨ ਸੁਰੱਖਿਆ ਵਿੱਚ ਯੋਗਦਾਨ ਪਾਉਂਦੀਆਂ ਹਨ
- ਸੋਕੇ ਦੇ ਦੌਰਾਨ, ਕਮਜ਼ੋਰ ਮੱਛੀਆਂ ਅਤੇ ਵਾਟਰਸ਼ੈਡਾਂ ਨੂੰ ਲੰਬੇ ਸਮੇਂ ਤੱਕ ਚੱਲਣ ਵਾਲੇ ਨੁਕਸਾਨ ਤੋਂ ਬਚਾਉਣ ਲਈ ਕਾਰਵਾਈਆਂ ਕੀਤੀਆਂ ਜਾ ਸਕਦੀਆਂ ਹਨ ਜਿਨ੍ਹਾਂ ਨੂੰ ਠੀਕ ਹੋਣ ਵਿੱਚ ਪੀੜ੍ਹੀਆਂ ਲੱਗ ਸਕਦੀਆਂ ਹਨ, ਜਿਨ੍ਹਾਂ ਵਿੱਚ ਸ਼ਾਮਲ ਹਨ:
- ਗੈਰ-ਘਰੇਲੂ ਪਾਣੀ ਦੀ ਵਰਤੋਂ ਨੂੰ ਘਟਾਉਣ ਜਾਂ ਰੋਕਣ ਲਈ ਅਸਥਾਈ ਸੁਰੱਖਿਆ ਆਦੇਸ਼
- ਐਂਗਲਿੰਗ ਸੀਮਾਵਾਂ ਕੁਝ ਖੇਤਰਾਂ ਵਿੱਚ ਦਿਲ ਪਰਚਾਵੇ ਲਈ ਫਿਸ਼ਿੰਗ ਨੂੰ ਸੀਮਤ ਕਰ ਸਕਦੀਆਂ ਹਨ ਕਿਉਂਕਿ ਪਰਿਸਥਿਤੀਆਂ ਛੱਡੀਆਂ ਗਈਆਂ ਮੱਛੀਆਂ ਨੂੰ ਰਿਕਵਰ ਕਰਨਾ ਮੁਸ਼ਕਲ ਬਣਾਉਂਦੀਆਂ ਹਨ
ਸ਼ਹਿਰੀ ਖੇਤਰਾਂ ਵਿੱਚ ਰਿੱਛ
- ਸੋਕੇ ਦੇ ਪ੍ਰਭਾਵ ਕਾਰਨ, ਹੋ ਸਕਦਾ ਹੈ ਕਿ ਭੋਜਨ ਦੀ ਤਲਾਸ਼ ਵਿੱਚ ਰਿੱਛ ਸ਼ਹਿਰੀ ਖੇਤਰਾਂ ਤੱਕ ਆ ਜਾਣ। ਅਕਸਰ, ਉਹਨਾਂ ਲਈ ਭੋਜਨ ਦਾ ਇਹ ਨਵਾਂ ਸਰੋਤ ਗਾਰਬੇਜ (ਕੂੜਾ) ਜਾਂ ਬਰਡਫ਼ੀਡਰ ਹੁੰਦੇ ਹਨ। ਕੂੜੇ ਦੀ ਸਫ਼ਾਈ ਕਰਕੇ, ਸਟੋਰ ਕਰਕੇ ਅਤੇ ਸੁਰੱਖਿਅਤ ਕਰਕੇ, ਰਿੱਛਾਂ ਨੂੰ ਆਉਣ ਤੋਂ ਰੋਕੋ। ਰਿੱਛਾਂ ਤੋਂ ਸੁਰੱਖਿਆ ਲਈ ਵਧੇਰੇ ਸੁਝਾਵਾਂ ਲਈ, WildSafeBC.com ‘ਤੇ ਜਾਓ
- 1-877-952-7277 ‘ਤੇ ਕੰਜ਼ਰਵੇਸ਼ਨ ਅਫਸਰ ਸਰਵਿਸ ਨਾਲ ਸੰਪਰਕ ਕਰੋ
ਸ਼ਹਿਰੀ ਰੁੱਖ
- ਫੁੱਟਪਾਥਾਂ ਦੇ ਨੇੜੇ ਅਤੇ ਜਨਤਕ ਥਾਂਵਾਂ ਜਾਂ ਬੁਲੇਵਾਰਡਾਂ ‘ਤੇ ਰੁੱਖ ਸ਼ਹਿਰਾਂ ਦੇ ਵਾਤਾਵਰਨ ਦੀ ਤੰਦਰੁਸਤੀ ਲਈ ਮਹੱਤਵਪੂਰਨ ਹਨ। ਇਹ ਅਤਿਅੰਤ ਗਰਮੀ ਦੌਰਾਨ ਛਾਂ ਅਤੇ ਠੰਡਕ ਦਿੰਦੇ ਹਨ।
- ਕਮਿਊਨਿਟੀਆਂ ਇਹਨਾਂ ਸ਼ਹਿਰੀ ਰੁੱਖਾਂ ਨੂੰ ਪਾਣੀ ਦੇਣਾ ਜਾਰੀ ਰੱਖਣਗੀਆਂ। ਆਪਣੇ ਘਰ ਜਾਂ ਕੰਮ ਦੇ ਨੇੜੇ ਕਿਸੇ ਰੁੱਖ ਨੂੰ ਪਾਣੀ ਦੇਣ ਲਈ ਰੀਸਾਈਕਲ ਕੀਤੇ ਪਾਣੀ ਦੀ ਵਰਤੋਂ ਕਰਕੇ ਮਦਦ ਕਰਨ ਬਾਰੇ ਵਿਚਾਰ ਕਰੋ। ਅਜਿਹੇ ਮੁਰਝਾ ਰਹੇ ਰੁੱਖ ਦੀ ਰਿਪੋਰਟ ਕਰਨ ਲਈ – ਜਿਸਦੇ ਪੱਤੇ ਹਲਕੇ ਰੰਗ ਦੇ ਹਨ, ਛੋਟੇ ਹਨ, ਜਾਂ ਅਸਧਾਰਨ ਤੌਰ ‘ਤੇ ਲਟਕ ਰਹੇ ਹਨ – ਕਿਰਪਾ ਕਰਕੇ ਆਪਣੀ ਸਥਾਨਕ ਸਰਕਾਰ ਜਾਂ ਫਰਸਟ ਨੇਸ਼ਨਜ਼ ਨਾਲ ਸੰਪਰਕ ਕਰੋ।
ਜੰਗਲੀ ਅੱਗਾਂ
- ਸੋਕੇ ਦੀਆਂ ਪਰਿਸਥਿਤੀਆਂ ਜੰਗਲੀ ਅੱਗ ਦੇ ਜੋਖਮ ਨੂੰ ਵਧਾਉਂਦੀਆਂ ਹਨ। ਬਿਜਲੀ ਅਤੇ ਤੇਜ਼ ਹਵਾਵਾਂ ਅਸਾਨੀ ਨਾਲ ਜੰਗਲੀ ਅੱਗਾਂ ਦੇ ਸ਼ੁਰੂ ਹੋਣ ਦਾ ਕਾਰਨ ਬਣ ਸਕਦੀਆਂ ਹਨ। ਗਰਮ ਅਤੇ ਖੁਸ਼ਕ ਮੌਸਮ ਅੱਗ ਦੇ ਤੇਜ਼ੀ ਨਾਲ ਫੈਲਣ ਅਤੇ ਦੇਰ ਤੱਕ ਜਲਦੇ ਰਹਿਣ ਦਾ ਕਾਰਨ ਬਣਦਾ ਹੈ।
- ਜੰਗਲੀ ਅੱਗ ਪ੍ਰਤੀ ਸਾਵਧਾਨੀ ਵਰਤੋ ਅਤੇ ਜੰਗਲੀ ਅੱਗਾਂ ਨੂੰ ਰੋਕਣ ਵਿੱਚ ਆਪਣਾ ਯੋਗਦਾਨ ਪਾਓ
- ਜੇਕਰ ਪਾਣੀ ਦੀਆਂ ਪਾਬੰਦੀਆਂ ਲਾਗੂ ਹੁੰਦੀਆਂ ਹਨ ਤਾਂ ਜੰਗਲੀ ਅੱਗ ਨਾਲ ਨਜਿੱਠਣ ਵਾਲੇ ਲੋਕ (wildfire crews) ਅੱਗ ਬੁਝਾਉਣ ਲਈ ਪਾਣੀ ਦੀ ਵਰਤੋਂ ਜਾਰੀ ਰੱਖ ਸਕਦੇ ਹਨ
ਭੋਜਨ ਸੁਰੱਖਿਆ
- ਸੋਕਾ ਫਸਲਾਂ ਦੀ ਉਪਜ ਅਤੇ ਗੁਣਵੱਤਾ ਨੂੰ ਘਟਾ ਸਕਦਾ ਹੈ, ਜਿਸ ਨਾਲ ਹੋ ਸਕਦਾ ਹੈ ਕਿ ਜ਼ਿਆਦਾ ਫਸਲ ਨਾ ਹੋਵੇ
- ਇਹੀ ਕਾਰਨ ਹੈ ਕਿ ਅਸੀਂ ਕਿਸਾਨਾਂ ਅਤੇ ਭੋਜਨ ਉਤਪਾਦਕਾਂ ਲਈ ਖੇਤਾਂ ਵਿੱਚ ਵਧੇਰੇ ਪਾਣੀ ਸਟੋਰੇਜ ਬਣਾ ਕੇ, ਸੋਕਾ-ਰਹਿਤ ਅਤੇ ਪਾਣੀ ਦੀ ਕੁਸ਼ਲ ਵਰਤੋਂ ਕਰਨ ਵਾਲੀਆਂ ਫਸਲਾਂ ਬੀਜ ਕੇ, ਅਤੇ ਸਹਾਇਤਾ ਅਤੇ ਸਰੋਤ ਪ੍ਰਦਾਨ ਕਰਕੇ ਸੋਕੇ ਲਈ ਤਿਆਰੀ ਕਰਨ ਵਿੱਚ ਮਦਦ ਕਰ ਰਹੇ ਹਾਂ
ਪੀਣ ਵਾਲਾ ਪਾਣੀ
- ਸੋਕਾ ਪਾਣੀ ਦੀ ਸਪਲਾਈ ਨੂੰ ਪ੍ਰਭਾਵਤ ਕਰ ਸਕਦਾ ਹੈ, ਪਾਣੀ ਦੀ ਗੁਣਵੱਤਾ ਨੂੰ ਪ੍ਰਭਾਵਤ ਕਰ ਸਕਦਾ ਹੈ ਅਤੇ ਪਾਣੀ ਦੇ ਵਹਾਅ ਜਾਂ ਪ੍ਰੈਸ਼ਰ ਨੂੰ ਘਟਾ ਸਕਦਾ ਹੈ
- ਜੇਕਰ ਸੋਕੇ ਕਾਰਨ ਕਿਸੇ ਕਮਿਊਨਿਟੀ ਦੀ ਪਾਣੀ ਸਪਲਾਈ ਨੂੰ ਖਤਰਾ ਹੁੰਦਾ ਹੈ, ਤਾਂ ਜਨਤਕ ਸਿਹਤ ਅਤੇ ਸੁਰੱਖਿਆ ਲਈ ਐਮਰਜੈਂਸੀ ਸਪਲਾਈ ਪ੍ਰਦਾਨ ਕੀਤੀ ਜਾਵੇਗੀ
ਕਿਸਾਨਾਂ ਅਤੇ ਭੋਜਨ ਉਤਪਾਦਕਾਂ ਲਈ ਸਰੋਤ
ਸੋਕੇ ਕਾਰਨ ਕਿਸਾਨਾਂ ਅਤੇ ਸਾਡੀ ਸਮੁੱਚੀ ਭੋਜਨ ਸੁਰੱਖਿਆ ‘ਤੇ ਜੋ ਦਬਾਅ ਪੈਂਦਾ ਹੈ ਅਤੇ ਜਿਨ੍ਹਾਂ ਚੁਣੌਤੀਆਂ ਦਾ ਉਨ੍ਹਾਂ ਨੂੰ ਸਾਹਮਣਾ ਕਰਨਾ ਪੈਂਦਾ ਹੈ, ਅਸੀਂ ਉਹਨਾਂ ਨੂੰ ਪਛਾਣਦੇ ਹਾਂ। ਇਸ ਲਈ ਅਸੀਂ ਕਿਸਾਨਾਂ ਦੀ ਹਰ ਕਦਮ ‘ਤੇ ਮਦਦ ਕਰ ਰਹੇ ਹਾਂ। ਹੇਠਾਂ ਦਿੱਤੇ ਸਾਧਨ ਕਿਸਾਨਾਂ ਅਤੇ ਖਾਦ ਉਤਪਾਦਕਾਂ ਨੂੰ ਸੋਕੇ ਸੰਬੰਧੀ ਹਾਲਾਤਾਂ ਲਈ ਤਿਆਰੀ ਕਰਨ, ਉਨ੍ਹਾਂ ਦਾ ਪ੍ਰਬੰਧਨ ਕਰਨ ਅਤੇ ਉਨ੍ਹਾਂ ਤੋਂ ਮੁੜ ਸੰਭਲਣ ਵਿੱਚ ਮਦਦ ਕਰ ਸਕਦੇ ਹਨ।
ਸੋਕੇ ਲਈ ਸਰੋਤ
- ਖੇਤੀਬਾੜੀ ਵਿੱਚ ਸੋਕੇ ਸੰਬੰਧੀ ਵੈੱਬਪੇਜ ਪਾਣੀ ਪ੍ਰਬੰਧਨ ਲਈ ਸਾਧਨ, ਮਾਰਗਦਰਸ਼ਨ ਅਤੇ ਆਰਥਿਕ ਸਹਾਇਤਾ ਬਾਰੇ ਜਾਣਕਾਰੀ ਮੁਹੱਈਆ ਕਰਦਾ ਹੈ, ਤਾਂ ਜੋ ਉਤਪਾਦਕ ਸੋਕੇ ਲਈ ਤਿਆਰੀ, ਪ੍ਰਤਿਕਿਰਿਆ ਅਤੇ ਮੁੜ ਸੰਭਾਲ ਕਰ ਸਕਣ।
- ਸੋਕੇ ਬਾਰੇ ਜਾਣਕਾਰੀ ਲਈ ਪੋਰਟਲ ਬੀ.ਸੀ. ਦੇ 41 ਸੋਕੇ ਦੇ ਬੇਸਿਨਾਂ ਵਿੱਚ ਸੋਕੇ ਦੇ ਪੱਧਰ ਦਾ ਵਰਗੀਕਰਨ ਦਰਸਾਉਂਦਾ ਹੈ। ਪਾਣੀ ਦੀ ਸਟੋਰੇਜ, ਸਪਲਾਈ ਅਤੇ ਮੰਗ ਦੇ ਅਧਾਰ ‘ਤੇ ਹਰੇਕ ਬੇਸਿਨ ਦੇ ਅੰਦਰ ਸਥਾਨਕ ਪਰਿਸਥਿਤੀਆਂ ਵੱਖ-ਵੱਖ ਹੋ ਸਕਦੀਆਂ ਹਨ।
- ਸੋਕੇ ਦੇ ਸਰੋਤਾਂ ਲਈ ਗਾਈਡ (Quick Guide to Drought Resources) (PDF, 180KB) ਉਤਪਾਦਕਾਂ ਲਈ ਸੋਕੇ ਨਾਲ ਸੰਬੰਧਿਤ ਸਾਧਨਾਂ ਦੀ ਤੁਰੰਤ ਸੰਦਰਭ ਜਾਣਕਾਰੀ ਮੁਹੱਈਆ ਕਰਦਾ ਹੈ।
ਸੋਕੇ ਅਤੇ ਪਾਣੀ ਦੇ ਪ੍ਰਬੰਧਨ ਲਈ ਵਰਕਸ਼ਾਪਾਂ
- ਵਰਕਸ਼ਾਪਾਂ, ਫਾਰਮ ‘ਤੇ ਪ੍ਰਦਰਸ਼ਨੀਆਂ (ਡੈਮੋਨਸਟ੍ਰੇਸ਼ਨ) ਅਤੇ ਵੈਬਿਨਾਰ ਸੂਬੇ ਭਰ ਵਿੱਚ ਕਰਵਾਏ ਜਾਂਦੇ ਹਨ, ਤਾਂ ਜੋ ਕਿਸਾਨਾਂ ਨੂੰ ਹੁਨਰ ਵਿਕਸਿਤ ਕਰਨ ਵਿੱਚ ਮਦਦ ਮਿਲੇ, ਜਿਸ ਵਿੱਚ ਪਾਣੀ ਪ੍ਰਬੰਧਨ ਯੋਜਨਾ ਬਣਾਉਣ ਅਤੇ ਸੋਕੇ ਲਈ ਤਿਆਰੀ ਕਰਨਾ ਸ਼ਾਮਲ ਹੈ।
- ਆਉਣ ਵਾਲੇ ਸਮਾਗਮਾਂ ਬਾਰੇ ਜਾਣਕਾਰੀ ‘ਐਗ੍ਰੀ ਸਰਵਿਸ ਬੀ ਸੀ’ ਦੇ ਇਵੈਂਟਸ ਪੇਜ ’ਤੇ ਲੱਭੋ।
ਆਰਥਿਕ ਅਤੇ ਲੌਜਿਸਟਿਕਲ (ਸੰਚਾਲਕੀ) ਸਹਾਇਤਾ
- ਸੋਕੇ ਨਾਲ ਪ੍ਰਭਾਵਿਤ ਕਿਸਾਨ ਅਤੇ ਖਾਦ ਉਤਪਾਦਕ ਨੁਕਸਾਨਾਂ ਦੀ ਭਰਪਾਈ ਕਰਕੇ ਮੁੜ ਸੰਭਲਣ ਵਿੱਚ ਮਦਦ ਲਈ ਆਰਥਿਕ ਸਹਾਇਤਾ ਲੈ ਸਕਦੇ ਹਨ, ਜਿਸ ਵਿੱਚ ਆਰਥਿਕ ਸਹਾਇਤਾ ਪ੍ਰੋਗਰਾਮ, ਇਨਸ਼ੋਰੈਂਸ ਅਤੇ ਆਮਦਨੀ ਸੁਰੱਖਿਆ ਸ਼ਾਮਲ ਹਨ:
-
‘ਐਕਸੈਸ ਟੂ ਫੀਡ’ ਪ੍ਰੋਗਰਾਮ ਸੋਕੇ ਅਤੇ ਚਾਰੇ ਦੀ ਕਮੀ ਦਾ ਸਾਹਮਣਾ ਕਰ ਰਹੇ ਕਿਸਾਨਾਂ ਅਤੇ ਪਸ਼ੂ-ਪਾਲਕਾਂ ਦੀ ਉਤਪਾਦਕਾਂ ਨੂੰ ਉਪਲਬਧ ਚਾਰੇ ਦੀ ਸਪਲਾਈ ਨਾਲ ਜੋੜ ਕੇ ਉਨ੍ਹਾਂ ਦੀ ਸਹਾਇਤਾ ਕਰਦਾ ਹੈ। ਹੋਰ ਜਾਣਕਾਰੀ ਲਈ ‘ਬੀ ਸੀ ਕੈਟਲਮੈਨਜ਼ ਅਸੋਸੀਏਸ਼ਨ’ ਨਾਲ ਸੰਪਰਕ ਕਰੋ।
ਵਧੇਰੇ ਜਾਣਕਾਰੀ ਅਤੇ ਸਹਾਇਤਾ ਲਓ
- ਕਿਸਾਨ ਅਤੇ ਖਾਦ ਉਤਪਾਦਕ ਆਪਣੇ ਖੇਤਰ ਦੇ ਐਗ੍ਰੋਲੌਜਿਸਟਸ ਨਾਲ ਸੰਪਰਕ ਕਰ ਸਕਦੇ ਹਨ, ਈ-ਬੁਲੇਟਿਨ ਲਈ ਸਾਈਨ-ਅੱਪ ਕਰ ਸਕਦੇ ਹਨ ਅਤੇ ਹੋਰ ਸਹਾਇਤਾ ਲਈ ‘ਐਗ੍ਰੀ ਸਰਵਿਸ ਬੀ ਸੀ’ ਨਾਲ ਵੀ ਜੁੜ ਸਕਦੇ ਹਨ:
- ਆਪਣਾ ਖੇਤਰੀ ਐਗ੍ਰੋਲੌਜਿਸਟ ਲੱਭੋ
- ਮਹੀਨਾਵਾਰ ‘ਐਗ੍ਰੀ ਸਰਵਿਸ ਬੀ ਸੀ’ ਈ-ਬੁਲੇਟਿਨ ਲਈ ਸਾਈਨ-ਅੱਪ ਕਰੋ। ਸੋਕੇ ਨਾਲ ਪ੍ਰਭਾਵਿਤ ਖੇਤਰਾਂ ਦੇ ਸਬਸਕਰਾਈਬਰਾਂ ਨੂੰ, ਜਾਰੀ ਕੀਤੇ ਜਾਣ ‘ਤੇ, ਸੋਕੇ ਸੰਬੰਧੀ ਖਾਸ ਈ-ਬੁਲੇਟਿਨ ਭੇਜੇ ਜਾਣਗੇ।
- ‘ਐਗ੍ਰੀ ਸਰਵਿਸ ਬੀ ਸੀ’ ਨਾਲ ਈਮੇਲ ਰਾਹੀਂ AgriServiceBC@gov.bc.ca ‘ਤੇ ਜਾਂ ਫੋਨ ਰਾਹੀਂ 1-888-221-7141 ‘ਤੇ ਸੰਪਰਕ ਕਰੋ (ਸੋਮਵਾਰ ਤੋਂ ਸ਼ੁੱਕਰਵਾਰ, ਸਵੇਰੇ 8:30 ਵਜੇ ਤੋਂ ਸ਼ਾਮ 4:30 ਵਜੇ ਤੱਕ)
ਕਮਿਊਨਿਟੀਆਂ ਲਈ ਸਰੋਤ
ਅਸੀਂ ਸੋਕੇ ਦੀ ਤਿਆਰੀ ਲਈ ਸਥਾਨਕ ਸਰਕਾਰਾਂ ਅਤੇ ਫਰਸਟ ਨੇਸ਼ਨਜ਼ ਨਾਲ ਸਾਲ ਭਰ ਕੰਮ ਕਰਦੇ ਹਾਂ ਅਤੇ ਇਹ ਯਕੀਨੀ ਬਣਾਉਂਦੇ ਹਾਂ ਕਿ ਭਾਈਚਾਰਿਆਂ ਕੋਲ ਲੋੜੀਂਦਾ ਪਾਣੀ ਹੋਵੇ।
ਕਮਿਊਨਿਟੀ ਦੀ ਤਿਆਰੀ
- ਸੋਕੇ ਬਾਰੇ ਜਾਣਕਾਰੀ ਲਈ ਪੋਰਟਲ ਬੀ.ਸੀ. ਦੇ 41 ਸੋਕੇ ਦੇ ਬੇਸਿਨਾਂ ਵਿੱਚ ਸੋਕੇ ਦੇ ਪੱਧਰ ਦਾ ਵਰਗੀਕਰਨ ਦਰਸਾਉਂਦਾ ਹੈ। ਪਾਣੀ ਦੀ ਸਟੋਰੇਜ, ਸਪਲਾਈ ਅਤੇ ਮੰਗ ਦੇ ਅਧਾਰ ‘ਤੇ ਹਰੇਕ ਬੇਸਿਨ ਦੇ ਅੰਦਰ ਸਥਾਨਕ ਪਰਿਸਥਿਤੀਆਂ ਵੱਖ-ਵੱਖ ਹੋ ਸਕਦੀਆਂ ਹਨ।
- ਵਾਟਰ ਕੰਜ਼ਰਵੇਸ਼ਨ ਕੈਲਕਿਉਲੇਟਰ ਸਥਾਨਕ ਸਰਕਾਰਾਂ ਅਤੇ ਫਰਸਟ ਨੇਸ਼ਨਜ਼ ਦੀ ਇਹ ਸਮਝਣ ਵਿੱਚ ਮਦਦ ਕਰਦਾ ਹੈ ਕਿ ਪਾਣੀ ਅਤੇ ਵਿੱਤੀ ਸਰੋਤਾਂ, ਦੋਵਾਂ ਦੀ ਬਚਤ ਕਰਨ ਲਈ ਖਾਸ ਸੁਰੱਖਿਆ ਉਪਾਵਾਂ ਦੀ ਵਰਤੋਂ ਕਿਵੇਂ ਕੀਤੀ ਜਾ ਸਕਦੀ ਹੈ।
- ਸੋਕੇ ਅਤੇ ਹੋਰ ਕੁਦਰਤੀ ਆਫ਼ਤਾਂ ਦੇ ਖਤਰਿਆਂ ਦੀ ਪਛਾਣ ਕਰਨ, ਉਹਨਾਂ ਦੇ ਪ੍ਰਭਾਵਾਂ ਨੂੰ ਘਟਾਉਣ ਅਤੇ ਉਹਨਾਂ ਲਈ ਤਿਆਰੀ ਕਰਨ ਲਈ ਕਮਿਊਨਿਟੀ ਐਮਰਜੈਂਸੀ ਤਿਆਰੀ ਦੇ ਸਰੋਤ ਉਪਲਬਧ ਹਨ।
ਸਥਾਨਕ ਸਰਕਾਰਾਂ ਦੁਆਰਾ ਪਾਣੀ ਦੀ ਕਮੀ ਦਾ ਪ੍ਰਬੰਧਨ
- ਸਥਾਨਕ ਸਰਕਾਰਾਂ ਡੇਟਾ ਇਕੱਠਾ ਕਰਨ, ਪ੍ਰੋਗਰਾਮ ਅਤੇ ਜਾਣਕਾਰੀ ਪ੍ਰਦਾਨ ਕਰਨ, ਐਮਰਜੈਂਸੀ ਪ੍ਰਤਿਕਿਰਿਆ ਅਤੇ ਹੋਰ ਸਾਧਨਾਂ ਅਤੇ ਕਾਰਜਨੀਤੀਆਂ ਦੁਆਰਾ ਸੋਕੇ ਲਈ ਪ੍ਰਬੰਧਨ ਵਿੱਚ ਸਹਿਯੋਗ ਦੇ ਸਕਦੀਆਂ ਹਨ।
- ਹੋਰ ਜਾਣਕਾਰੀ ਪ੍ਰਾਪਤ ਕਰੋ
ਪਾਣੀ ਦੇ ਬੁਨਿਆਦੀ ਢਾਂਚਿਆਂ ਵਿੱਚ ਸੁਧਾਰ ਕਰਨਾ
- ਪੀਣ ਵਾਲੇ ਪਾਣੀ ਅਤੇ ਗੰਦੇ ਪਾਣੀ ਨੂੰ ਸਾਫ ਕਰਨ ਦੀਆਂ ਪ੍ਰਣਾਲੀਆਂ ਨੂੰ ਬਿਹਤਰ ਬਣਾਉਣ, ਤੱਟਵਰਤੀ (coastal) ਪਾਣੀ ਦੀ ਰੱਖਿਆ ਕਰਨ, ਅਤੇ ਸੋਕੇ ਦੇ ਪ੍ਰਭਾਵਾਂ ਨੂੰ ਘਟਾਉਣ ਲਈ ਕਮਿਊਨਿਟੀਆਂ ਲਈ ਵੱਖ-ਵੱਖ ਗ੍ਰਾਂਟ ਪ੍ਰੋਗਰਾਮ ਉਪਲਬਧ ਹਨ।
ਵਾਟਰਸ਼ੈਡ ਸੁਰੱਖਿਆ ਫੰਡ
- ਵਾਟਰਸ਼ੈਡ ਸੁਰੱਖਿਆ ਫੰਡ ਉਹਨਾਂ ਪ੍ਰੋਜੈਕਟਾਂ ਨੂੰ ਸਹਿਯੋਗ ਦਿੰਦਾ ਹੈ ਜੋ ਸੂਬੇ ਭਰ ਵਿੱਚ ਵਾਟਰਸ਼ੈਡਾਂ ਨੂੰ ਬਹਾਲ ਕਰਦੇ ਹਨ, ਅਤੇ ਉਹਨਾਂ ਦੀ ਸੁਰੱਖਿਆ ਅਤੇ ਨਿਗਰਾਨੀ ਕਰਦੇ ਹਨ।
ਸੈਲਮਨ ਸੁਰੱਖਿਆ ਅਤੇ ਵਾਟਰਸ਼ੈਡ ਬਹਾਲੀ
- ਬੀ.ਸੀ. ਉਹਨਾਂ ਪ੍ਰੋਜੈਕਟਾਂ ਨੂੰ ਫੰਡ ਦੇਣ ਲਈ ਭਾਈਵਾਲਾਂ ਨਾਲ ਕੰਮ ਕਰ ਰਿਹਾ ਹੈ, ਜੋ:
- ਸੈਲਮਨ ਅਤੇ ਹੋਰ ਤਰਜੀਹੀ ਜੰਗਲੀ ਮੱਛੀਆਂ ਦੀ ਸੁਰੱਖਿਆ ਅਤੇ ਬਹਾਲੀ ਕਰਦੇ ਹਨ
- ਮੱਛੀਆਂ ਦੇ ਨਿਵਾਸ ਸਥਾਨ ਦਾ ਮੁੜ ਨਿਰਮਾਣ ਕਰਦੇ ਹਨ
- ਮੱਛੀ ਪਾਲਣ ਅਤੇ ਮੱਛੀ ਫੜਨ ਦੇ ਟਿਕਾਊ ਅਭਿਆਸਾਂ ਦਾ ਪਾਲਣ ਕਰਦੇ ਹਨ
- ਸੋਕੇ ਦੌਰਾਨ ਸੈਲਮਨ ਦੀ ਸੁਰੱਖਿਆ ਲਈ ਐਮਰਜੈਂਸੀ ਦਖਲਅੰਦਾਜ਼ੀ ਕਰਦੇ ਹਨ
- ਬੀ ਸੀ ਸੈਲਮਨ ਰੈਸਟੋਰੇਸ਼ਨ ਐਂਡ ਇਨੋਵੇਸ਼ਨ ਫੰਡ
- ਵਾਈਲਡ ਸੈਲਮਨ ਰਿਕਵਰੀ ਇਨਵੈਸਟਮੈਂਟ
‘ਵਾਟਰ ਰੀਇੰਮਬਰਸਮੈਂਟ ਪ੍ਰੋਗਰਾਮ’ (Water Reimbursement Program)
- ਵਿਕਲਪਕ ਪੀਣ ਵਾਲੇ ਪਾਣੀ ਦੀ ਢੋਆ-ਢੁਆਈ ਲਈ ਫਰਸਟ ਨੇਸ਼ਨਜ਼ ਅਤੇ ਸਥਾਨਕ ਸਰਕਾਰਾਂ ਲਈ ਇੱਕ ਅਦਾਇਗੀ ਪ੍ਰੋਗਰਾਮ ਉਪਲਬਧ ਹੈ। ਜੇਕਰ ਲੋੜ ਹੋਵੇ, ਫਰਸਟ ਨੇਸ਼ਨਜ਼ ਅਤੇ ਸਥਾਨਕ ਸਰਕਾਰਾਂ ਨੂੰ ਆਪਣੇ ਸੂਬਾਈ ਖੇਤਰੀ ਐਮਰਜੈਂਸੀ ਤਾਲਮੇਲ ਕੇਂਦਰ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ।
- ਜੇਕਰ ਕੋਈ ਕਮਿਊਨਿਟੀ ਪਾਣੀ ਦੀ ਗੰਭੀਰ ਘਾਟ ਦਾ ਅਨੁਭਵ ਕਰਦੀ ਹੈ, ਤਾਂ ਉਸ ਨਾਲ ਨਜਿੱਠਣ ਲਈ ਇੱਕ ਐਮਰਜੈਂਸੀ ਪ੍ਰਤਿਕਿਰਿਆ ਲਾਗੂ ਕੀਤੀ ਜਾਵੇਗੀ
- ਜੇਕਰ ਲੋੜ ਹੋਵੇ, ਤਾਂ ਭਾਈਚਾਰਿਆਂ ਨੂੰ ਵਿਕਲਪਕ ਪੀਣ ਵਾਲੇ ਪਾਣੀ ਅਤੇ ‘ਡੀਸੇਲੇਨਾਈਜ਼ੇਸ਼ਨ ਯੂਨਿਟ’ (desalinization units) ਦੀ ਢੋਆ-ਢੁਆਈ ਲਈ ਅਦਾਇਗੀ ਕੀਤੀ ਜਾ ਸਕਦੀ ਹੈ। ਆਪਣੇ ਸੂਬਾਈ ਖੇਤਰੀ ਐਮਰਜੈਂਸੀ ਤਾਲਮੇਲ ਕੇਂਦਰ ਨਾਲ ਸੰਪਰਕ ਕਰੋ
ਸੈਰ-ਸਪਾਟਾ
- ਜਲ ਸੰਭਾਲ ਸੈਰ-ਸਪਾਟਾ ਉਦਯੋਗ ਟੂਲਕਿੱਟ (Water conservation tourism industry toolkit) ਵਿੱਚ ਰਿਜ਼ੋਰਟਾਂ, ਰੈਸਟੋਰੈਂਟਾਂ ਅਤੇ ਹੋਰ ਸੈਰ-ਸਪਾਟਾ ਉਦਯੋਗ ਦੇ ਭਾਈਵਾਲਾਂ ਲਈ ਪਾਣੀ ਬਚਾਉਣ ਵਿੱਚ ਮਦਦ ਕਰਨ ਲਈ ਸੁਝਾਅ ਹਨ
ਸਹਾਇਤਾ ਲਵੋ
- ਤਿਆਰੀ ਦੀ ਯੋਜਨਾ ਬਾਰੇ ਚਰਚਾ ਕਰਨ ਲਈ ਜਾਂ ਮਦਦ ਲੈਣ ਲਈ, ਆਪਣੇ ਸਥਾਨਕ ਐਮਰਜੈਂਸੀ ਪ੍ਰਬੰਧਨ ਅਤੇ ਜਲਵਾਯੂ ਤਬਦੀਲੀ ਲਈ ਤਿਆਰੀ ਲਈ ਖੇਤਰੀ ਦਫ਼ਤਰ (Emergency Management and Climate Readiness regional office) ਨਾਲ ਸੰਪਰਕ ਕਰੋ
- ਮਿਊਂਨਿਸਿਪਲ ਮਾਮਲਿਆਂ ਦੇ ਮੰਤਰਾਲੇ ਦੇ ਸਥਾਨਕ ਸਰਕਾਰ ਦੇ ਵਿਭਾਗ (Ministry of Municipal Affairs, Local Government Office) ਨਾਲ ਸੰਪਰਕ ਕਰ ਸਕਦੇ ਹਨ
ਵਾਟਰ ਲਾਇਸੈਂਧਾਰਕਾਂ ਲਈ ਸਰੋਤ
ਵਾਟਰ ਲਾਇਸੈਂਸ (ਪਾਣੀ ਦੀ ਵਰਤੋਂ ਲਈ ਲਾਇਸੈਂਸ) ਲੋਕਾਂ ਨੂੰ ਖੇਤੀਬਾੜੀ, ਉਦਯੋਗਿਕ ਅਤੇ ਹੋਰ ਉਦੇਸ਼ਾਂ ਲਈ ਸਤਹ ਦੇ ਪਾਣੀ (surface water) ਜਾਂ ਧਰਤੀ ਹੇਠਲੇ ਪਾਣੀ (groundwater) ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਦਿੰਦੇ ਹਨ। ਲਾਇਸੈਂਸ ਪ੍ਰਾਪਤ ਕਰਨਾ ਇਹ ਯਕੀਨੀ ਬਣਾਉਣ ਵਿੱਚ ਮਦਦ ਕਰਦਾ ਹੈ ਕਿ ਸੂਬੇ ਭਰ ਵਿੱਚ ਪਾਣੀ ਦਾ ਚੰਗੀ ਤਰ੍ਹਾਂ ਪ੍ਰਬੰਧਨ ਕੀਤਾ ਜਾਂਦਾ ਹੈ। ਪਾਣੀ ਦੀ ਵਰਤੋਂ ਲਈ ਲਾਇਸੈਂਸ ਕਿਵੇਂ ਲੈਣਾ ਹੈ, ਇਸ ਬਾਰੇ ਜਾਣੋ।
ਸੋਕੇ ਦੌਰਾਨ ਪਾਣੀ ਦੀ ਵਰਤੋਂ ਲਈ ਲਾਇਸੈਂਸ
ਪਾਣੀ ਦੀ ਕਮੀ ਦੇ ਸਮੇਂ, ਬੀ.ਸੀ. ਸਰਕਾਰ ਕੋਲ ਪਾਣੀ ਦੀ ਵਰਤੋਂ ਕਰਨ ਵਾਲਿਆਂ ਦੇ ਅਧਿਕਾਰਾਂ, ਜ਼ਰੂਰੀ ਘਰੇਲੂ ਲੋੜਾਂ ਅਤੇ ਵਾਤਾਵਰਨ ਦੀ ਸੁਰੱਖਿਆ ਲਈ ਕਨੂੰਨੀ ਵਿਕਲਪ ਹਨ। ਲਾਇਸੈਂਸ ਧਾਰਕਾਂ ਨੂੰ ਪਾਣੀ ਦੀ ਵਰਤੋਂ ਘਟਾਉਣ ਜਾਂ ਬੰਦ ਕਰਨ ਦੀ ਲੋੜ ਹੋ ਸਕਦੀ ਹੈ
ਗੈਰ-ਅਧਿਕਾਰਤ ਵਰਤੋਂ ਦਾ ਨਿਯੰਤਰਣ ਕਰਨਾ
ਗੈਰ-ਅਧਿਕਾਰਤ ਪਾਣੀ ਦੀ ਵਰਤੋਂ ਸੋਕੇ ਦੌਰਾਨ ਘੱਟ ਵਹਾਅ ਦੀਆਂ ਪਰਿਸਥਿਤੀਆਂ ਨੂੰ ਹੋਰ ਮਾੜਾ ਬਣਾ ਸਕਦੀ ਹੈ। ਲਾਇਸੈਂਸ ਧਾਰਕ ਸੂਬਾਈ ਸਟਾਫ਼ ਨੂੰ ਪਾਣੀ ਦਾ ਨਿਰਪੱਖ ਪ੍ਰਬੰਧਨ ਕਰਨ ਵਿੱਚ ਮਦਦ ਕਰਦੇ ਹਨ। ਜੇਕਰ ਤੁਸੀਂ ਪਾਣੀ ਦੀ ਗੈਰ-ਅਧਿਕਾਰਿਤ ਵਰਤੋਂ ਹੁੰਦੇ ਦੇਖਦੇ ਹੋ, ਤਾਂ ਇਸਦੀ ਔਨਲਾਈਨ ਜਾਂ 1-877-952-7277 ‘ਤੇ ਫੋਨ ਕਰਕੇ ਰਿਪੋਰਟ ਕਰੋ।
ਪਾਲਣਾ ਅਤੇ ਲਾਗੂਕਰਨ
ਪਾਣੀ ਦੀਆਂ ਪਾਬੰਦੀਆਂ ਜਾਂ ਅਸਥਾਈ ਸੁਰੱਖਿਆ ਆਦੇਸ਼ਾਂ ਦੀ ਪਾਲਣਾ ਕਰਨ ਵਿੱਚ ਅਸਫਲ ਰਹਿਣ ਦੇ ਨਤੀਜੇ ਵਜੋਂ ‘ਵਾਟਰ ਸਸਟੇਨੇਬਿਲਿਟੀ ਐਕਟ’ (Water Sustainability Act) ਦੇ ਤਹਿਤ ਹਰਜਾਨੇ ਅਤੇ $500,000 ਤੱਕ ਦੇ ਸਖਤ ਜੁਰਮਾਨੇ ਹੋ ਸਕਦੇ ਹਨ।
ਸੋਕੇ ਨਾਲ ਸੰਬੰਧਿਤ ਵੀਡੀਓ ਦੇਖੋ (ਅੰਗਰੇਜ਼ੀ ਵਿੱਚ ਉਪਲਬਧ)
ਬੀ.ਸੀ. ਦੇ ਬਰਸਾਤੀ ਹਿੱਸਿਆਂ ਵਿੱਚ ਵੀ, ਸੋਕਾ ਅਜੇ ਵੀ ਗੰਭੀਰ ਸਮੱਸਿਆਵਾਂ ਦਾ ਕਾਰਨ ਬਣ ਸਕਦਾ ਹੈ। ਕਈ ਵਾਰ ਇਸ ਨੂੰ ਤੁਰੰਤ ਸਮਝਣਾ ਅਸਾਨ ਨਹੀਂ ਹੁੰਦਾ। ਸੋਕਾ ਸਿਰਫ਼ ਇਸ ਗੱਲ ਬਾਰੇ ਨਹੀਂ ਹੁੰਦਾ ਕਿ ਕਿੰਨੀ ਬਰਸਾਤ ਪੈਂਦੀ ਹੈ, ਬਲਕਿ ਇਸ ਗੱਲ ਬਾਰੇ ਵੀ ਹੁੰਦਾ ਹੈ ਕਿ ਇਹ ਆਮ ਬਰਸਾਤ ਦੀ ਤੁਲਨਾ ਵਿੱਚ ਕਿੰਨੀ ਹੈ। ਇਸ ਵਿਡੀਓ ਵਿੱਚ ਦਿਖਾਇਆ ਗਿਆ ਹੈ ਕਿ ਕਿਵੇਂ ਸੋਕਾ ਚੁੱਪਚਾਪ ਵਾਤਾਵਰਨ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ। ਇਹ ਰੁੱਖਾਂ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ, ਮੱਛੀਆਂ ਲਈ ਨਦੀ ਦੇ ਪੱਧਰ ਨੂੰ ਘਟਾ ਸਕਦਾ ਹੈ, ਅਤੇ ਜੰਗਲੀ ਅੱਗਾਂ ਦੀ ਸੰਭਾਵਨਾ ਨੂੰ ਵਧੇਰੇ ਵਧਾ ਸਕਦਾ ਹੈ। ਇੱਕ ਹੋਰ ਖੁਸ਼ਕ ਬਸੰਤ ਦੀ ਸੰਭਾਵਨਾ ਦੌਰਾਨ, ਸੋਕੇ ਬਾਰੇ ਸਿੱਖਣਾ ਤੁਹਾਨੂੰ ਇਹ ਸਮਝਣ ਵਿੱਚ ਮਦਦ ਕਰ ਸਕਦਾ ਹੈ ਕਿ ਆਪਣੇ ਭਾਈਚਾਰੇ ਅਤੇ ਵਾਤਾਵਰਨ ਦੀ ਸੁਰੱਖਿਆ ਕਿਵੇਂ ਕਰਨੀ ਹੈ।
ਇਸ ਵਿੱਚ ਸ਼ਾਮਲ ਹਨ ਗ੍ਰੇਗ ਉਟਜ਼ਿਗ, ਵਾਤਾਵਰਨ ਦੀ ਸੰਭਾਲ ਦੇ ਵਿਗਿਆਨੀ ਅਤੇ ਭੂਮੀ ਵਰਤੋਂ ਯੋਜਨਾਬੰਦੀ ਸਲਾਹਕਾਰ।