ਇਨਫਲੂਐਂਜ਼ਾ (ਫਲੂ) ਟੀਕਾਕਰਣ ਪ੍ਰੋਗਰਾਮ
Publication date: October 5, 2026ਇਨਫਲੂਐਂਜ਼ਾ ਦੇ ਟੀਕਾਕਰਣ ਲਈ ਅਪੌਇੰਟਮੈਂਟਾਂ 13 ਅਕਤੂਬਰ, 2026 ਤੋਂ ਸ਼ੁਰੂ ਹੋਣਗੀਆਂ ਅਤੇ ਪਤਝੜ ਅਤੇ ਸਰਦੀਆਂ ਦੇ ਮੌਸਮ ਦੌਰਾਨ ਜਾਰੀ ਰਹਿਣਗੀਆਂ। ਬੀ.ਸੀ. ਵਿੱਚ ਹਰ ਉਹ ਵਿਅਕਤੀ ਜੋ ਗੈਟ ਵੈਕਸੀਨੇਟਿਡ ਸਿਸਟਮ ਵਿੱਚ ਰਜਿਸਟਰ ਹੈ, ਉਸ ਨੂੰ ਟੀਕਾਕਰਣ ਲਈ ਅਪੌਇੰਟਮੈਂਟ ਬੁੱਕ ਕਰਨ ਦਾ ਸਮਾਂ ਹੋਣ 'ਤੇ ਸੂਚਨਾ ਭੇਜੀ ਜਾਵੇਗੀ।
English | 繁體中文 | 简体中文 | Français | ਪੰਜਾਬੀ | Tagalog
ਬਿਲਕੁਲ ਤਾਜ਼ਾ ਜਾਣਕਾਰੀ ਲਈ, ਕ੍ਰਿਪਾ ਕਰ ਕੇ ਅੰਗ੍ਰੇਜ਼ੀ ਪੰਨੇ ‘ਤੇ ਜਾਉ
ਇਸ ਪੰਨੇ ‘ਤੇ
- ਆਪਣੇ ਇਨਫਲੂਐਂਜ਼ਾ ਟੀਕਾਕਰਣ ਬਾਰੇ ਤਾਜ਼ਾ ਜਾਣਕਾਰੀ ਲਓ
- ਆਪਣੀ ਅਪੌਇੰਟਮੈਂਟ ਕਿਵੇਂ ਬੁੱਕ ਕਰਨੀ ਹੈ
- ਆਪਣੀ ਅਪੌਇੰਟਮੈਂਟ ਵਿੱਚ ਤਬਦੀਲੀ ਕਰੋ ਜਾਂ ਇਸਨੂੰ ਰੱਦ ਕਰੋ
- ਗੈਟ ਵੈਕਸੀਨੇਟਿਡ ਵਿੱਚ ਆਪਣੀ ਸੰਪਰਕ ਜਾਣਕਾਰੀ ਸ਼ਾਮਲ ਕਰੋ ਜਾਂ ਅੱਪਡੇਟ ਕਰੋ
- ਇਨਫਲੂਐਂਜ਼ਾ ਬਾਰੇ ਜਾਣਕਾਰੀ ਲਓ
- ਤੁਹਾਨੂੰ ਮਦਦ ਦੀ ਲੋੜ ਹੈ
ਆਪਣੇ ਇਨਫਲੂਐਂਜ਼ਾ ਟੀਕਾਕਰਣ ਬਾਰੇ ਤਾਜ਼ਾ ਜਾਣਕਾਰੀ ਲਓ
ਇਨਫਲੂਐਂਜ਼ਾ ਇੱਕ ਛੂਤਕਾਰੀ ਸਾਹ ਦੀ ਬਿਮਾਰੀ ਹੈ ਜੋ ਇਨਫਲੂਐਂਜ਼ਾ ਵਾਇਰਸਾਂ ਕਾਰਨ ਹੁੰਦੀ ਹੈ ਅਤੇ ਨੱਕ, ਗਲ਼ੇ ਅਤੇ ਕਈ ਵਾਰ ਫੇਫੜਿਆਂ ਨੂੰ ਪ੍ਰਭਾਵਿਤ ਕਰਦੀ ਹੈ। ਇਹ ਹਲਕੀ ਤੋਂ ਗੰਭੀਰ ਬਿਮਾਰੀ ਦਾ ਕਾਰਨ ਬਣ ਸਕਦੀ ਹੈ ਅਤੇ ਇਸ ਨਾਲ ਪੇਚੀਦਗੀਆਂ ਪੈਦਾ ਹੋ ਸਕਦੀਆਂ ਹਨ, ਇੱਥੋਂ ਤੱਕ ਕਿ ਮੌਤ ਵੀ ਹੋ ਸਕਦੀ ਹੈ।
ਇਨਫਲੂਐਂਜ਼ਾ ਤੋਂ ਬਚਾਅ ਦਾ ਸਭ ਤੋਂ ਵਧੀਆ ਤਰੀਕਾ ਹਰ ਸਾਲ ਵੈਕਸੀਨ ਲਗਵਾਉਣਾ ਹੈ।
ਇਸ ਪਤਝੜ ਅਤੇ ਸਰਦੀਆਂ ਦੇ ਮੌਸਮ ਦੌਰਾਨ, ਬੀ.ਸੀ. ਦੇ 6 ਮਹੀਨੇ ਜਾਂ ਇਸ ਤੋਂ ਵੱਧ ਉਮਰ ਦੇ ਸਾਰੇ ਨਿਵਾਸੀ ਇਨਫਲੂਐਂਜ਼ਾ ਦਾ ਟੀਕਾਕਰਣ ਮੁਫ਼ਤ ਕਰਵਾ ਸਕਦੇ ਹਨ।
ਇਨਫਲੂਐਂਜ਼ਾ ਦੇ ਟੀਕਾਕਰਣ ਦੀ ਸਿਫ਼ਾਰਿਸ਼ ਹੇਠ ਲਿਖੇ ਲੋਕਾਂ ਲਈ ਕੀਤੀ ਜਾਂਦੀ ਹੈ:
- 65 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਬਾਲਗ - ਵਧੇਰੇ ਸੁਰੱਖਿਆ ਦੇਣ ਵਾਲੀ ਖਾਸ ਇਨਫਲੂਐਂਜ਼ਾ ਦੀ ਵੈਕਸੀਨ ਉਪਲਬਧ ਹੈ
- ਲੌਂਗ-ਟਰਮ ਕੇਅਰ ਵਿੱਚ ਜਾਂ ਅਸਿਸਟਿਡ ਲਿਵਿੰਗ ਫੈਸੀਲਿਟਿਆਂ ਵਿੱਚ ਰਹਿ ਰਹੇ ਲੋਕ
- ਡਾਕਟਰੀ ਤੌਰ ‘ਤੇ ਕਮਜ਼ੋਰ (ਇਮਿਊਨੋਕੌਮਪ੍ਰੋਮਾਈਜ਼ਡ) ਜਾਂ ਕੋਈ ਲਾਇਲਾਜ (ਕਰੌਨਿਕ) ਬਿਮਾਰੀ ਵਾਲੇ ਲੋਕ
- ਫਰਸਟ ਨੇਸ਼ਨਜ਼, ਇਨੂਇਟ ਅਤੇ ਮੇਟੀ ਲੋਕ
- 6 ਮਹੀਨੇ ਤੋਂ 5 ਸਾਲ ਤੋਂ ਘੱਟ ਉਮਰ ਦੇ ਬੱਚੇ
- ਉਹ ਲੋਕ ਜੋ ਗਰਭਵਤੀ ਹਨ
- ਉਹ ਲੋਕ ਜੋ ਇਨਫਲੂਐਂਜ਼ਾ ਨੂੰ ਉਨ੍ਹਾਂ ਵਿਅਕਤੀਆਂ ਤੱਕ ਫੈਲਾ ਸਕਦੇ ਹਨ ਜਿਨ੍ਹਾਂ ਨੂੰ ਗੰਭੀਰ ਬਿਮਾਰੀ ਹੋਣ ਦਾ ਵੱਧ ਜੋਖਮ ਹੈ, ਅਤੇ ਉਹ ਲੋਕ ਜੋ ਭਾਈਚਾਰੇ ਲਈ ਜ਼ਰੂਰੀ ਸੇਵਾਵਾਂ ਮੁਹੱਈਆ ਕਰਦੇ ਹਨ, ਜਿਵੇਂ ਕਿ ਸਿਹਤ ਸੰਭਾਲ ਕਾਮੇ ਅਤੇ ਫਰਸਟ ਰਿਸਪਾਂਡਰ
ਜੇ ਤੁਹਾਡੇ ਕੋਈ ਸਵਾਲ ਹਨ, ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਨਕ ਨਾਲ ਸੰਪਰਕ ਕਰੋ ਜਾਂ ਕਾਲ ਸੈਂਟਰ ਨੂੰ ਫ਼ੋਨ ਕਰੋ।
ਬਜ਼ੁਰਗਾਂ ਲਈ ਖਾਸ ਵੈਕਸੀਨ ਉਪਲਬਧ ਹਨ
65 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਲਈ ਅਜਿਹੇ ਇਨਫਲੂਐਂਜ਼ਾ ਵੈਕਸੀਨ ਉਪਲਬਧ ਹਨ ਜੋ ਸਰੀਰ ਦੀ ਬਿਮਾਰੀ ਨਾਲ ਲੜਨ ਦੀ ਤਾਕਤ ਵਧਾਉਣ ਵਿੱਚ ਮਦਦ ਕਰਦੇ ਹਨ।
ਇਨਫਲੂਐਂਜ਼ਾ ਬੱਚਿਆਂ ਵਿੱਚ ਗੰਭੀਰ ਬਿਮਾਰੀ ਦਾ ਕਾਰਨ ਬਣ ਸਕਦਾ ਹੈ
ਛੋਟੇ ਬੱਚਿਆਂ ਨੂੰ ਸਾਹ ਦੀਆਂ ਬਿਮਾਰੀਆਂ ਤੋਂ ਵਧੇਰੇ ਖਤਰਾ ਹੈ। ਗੰਭੀਰ ਬਿਮਾਰੀ ਤੋਂ ਬਚਾਅ ਲਈ, ਹਰ ਸਾਲ ਆਪਣੇ ਬੱਚੇ ਦਾ ਟੀਕਾਕਰਣ ਕਰਵਾਓ। ਤੁਹਾਡੇ ਬੱਚੇ ਲਈ ਇਨਫਲੂਐਂਜ਼ਾ ਵੈਕਸੀਨ ਉਸੇ ਸਮੇਂ ਲਗਵਾ ਲੈਣਾ ਸੁਰੱਖਿਅਤ ਹੈ ਜਦੋਂ ਉਸ ਨੂੰ ਹੋਰ ਵੈਕਸੀਨ ਲੱਗ ਰਹੀਆਂ ਹੁੰਦੀਆਂ ਹਨ। ਵੈਕਸੀਨ ਆਮ ਤੌਰ 'ਤੇ ਹਰ ਸਾਲ ਪਤਝੜ ਵਿੱਚ 1 ਖੁਰਾਕ ਵਜੋਂ ਦਿੱਤੀ ਜਾਂਦੀ ਹੈ। 9 ਸਾਲ ਤੋਂ ਘੱਟ ਉਮਰ ਦੇ ਬੱਚੇ, ਜਿੰਨ੍ਹਾਂ ਨੇ ਕਦੇ ਵੀ ਇਨਫਲੂਐਂਜ਼ਾ ਵੈਕਸੀਨ ਨਹੀਂ ਲਈ, ਉਹਨਾਂ ਨੂੰ 2 ਖੁਰਾਕਾਂ ਦੀ ਲੋੜ ਹੈ, ਅਤੇ ਹਰ ਖੁਰਾਕ ਦੇ ਵਿਚਕਾਰ 4 ਹਫ਼ਤਿਆਂ ਦਾ ਸਮਾਂ ਹੋਣਾ ਚਾਹੀਦਾ ਹੈ। ਦੂਜੀ ਖੁਰਾਕ ਉਨ੍ਹਾਂ ਦੀ ਸੁਰੱਖਿਆ ਨੂੰ ਪਹਿਲੀ ਖੁਰਾਕ ਨਾਲੋਂ ਵਧਾਉਣ ਲਈ ਮਹੱਤਵਪੂਰਨ ਹੈ। 2 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਬੱਚੇ ਇਨਫਲੂਐਂਜ਼ਾ ਦੀ ਵੈਕਸੀਨ ਨੱਕ ਰਾਹੀਂ ਸਪਰੇਅ ਵਜੋਂ ਵੀ ਲੈ ਸਕਦੇ ਹਨ।
ਆਪਣੀ ਅਪੌਇੰਟਮੈਂਟ ਕਿਵੇਂ ਬੁੱਕ ਕਰਨੀ ਹੈ
ਅਕਤੂਬਰ ਤੋਂ ਨਵੰਬਰ 2026 ਤੱਕ, ਬੀ.ਸੀ. ਵਿੱਚ ਗੈਟ ਵੈਕਸੀਨੇਟਿਡ ਸਿਸਟਮ ਵਿੱਚ ਰਜਿਸਟਰ ਕੀਤੇ ਸਾਰੇ ਲੋਕਾਂ ਨੂੰ ਸੂਚਨਾਵਾਂ ਭੇਜੀਆਂ ਜਾਣਗੀਆਂ। ਜਦੋਂ ਤੁਹਾਡੀ ਅਪੌਇੰਟਮੈਂਟ ਬੁੱਕ ਕਰਨ ਦਾ ਸਮਾਂ ਹੋਵੇਗਾ, ਤੁਹਾਨੂੰ ਸੂਚਨਾ ਮਿਲੇਗੀ।
ਜੇ ਤੁਹਾਨੂੰ ਨਵੰਬਰ ਦੇ ਅੱਧ ਤੱਕ ਸੂਚਨਾ ਨਹੀਂ ਮਿਲਦੀ, ਤਾਂ ਆਪਣੀ ਅਪੌਇੰਟਮੈਂਟ ਬੁੱਕ ਕਰਨ ਲਈ 1-833-838-2323 ’ਤੇ ਕਾਲ ਕਰੋ ਜਾਂ ਗੈਟ ਵੈਕਸੀਨੇਟਿਡ ਸਿਸਟਮ ਵਿੱਚ ਲੌਗ ਇਨ ਕਰੋ।
ਇਨਫਲੂਐਂਜ਼ਾ ਦੇ ਵੈਕਸੀਨ ਲਈ ਅਪੌਇੰਟਮੈਂਟਾਂ 13 ਅਕਤੂਬਰ, 2026 ਤੋਂ ਸ਼ੁਰੂ ਹੋਣਗੀਆਂ ਅਤੇ ਇਸ ਪਤਝੜ ਅਤੇ ਸਰਦੀਆਂ ਦੌਰਾਨ ਜਾਰੀ ਰਹਿਣਗੀਆਂ। ਬੀ.ਸੀ. ਵਿੱਚ ਵੈਕਸੀਨ ਪਹੁੰਚਣ ਦੇ ਨਾਲ ਹੋਰ ਅਪੌਇੰਟਮੈਂਟਾਂ ਲਈ ਸਮਾਂ ਵੀ ਉਪਲਬਧ ਕਰਵਾਇਆ ਜਾਵੇਗਾ।
ਅਪੌਇੰਟਮੈਂਟ ਬੁੱਕ ਕਰੋਔਨਲਾਈਨ ਆਪਣੀ ਅਪੌਇੰਟਮੈਂਟ ਬੁੱਕ ਕਰਨ ਲਈ ਤੁਹਾਨੂੰ ਆਪਣਾ ਪਰਸਨਲ ਹੈਲਥ ਨੰਬਰ (PHN) ਚਾਹੀਦਾ ਹੋਵੇਗਾ।
ਆਪਣੀ ਅਪੌਇੰਟਮੈਂਟ ਵਿੱਚ ਤਬਦੀਲੀ ਕਰੋ ਜਾਂ ਇਸਨੂੰ ਰੱਦ ਕਰੋ
ਅਪੌਇੰਟਮੈਂਟ ਅੱਪਡੇਟ ਕਰੋਔਨਲਾਈਨ ਆਪਣੀ ਅਪੌਇੰਟਮੈਂਟ ਬਦਲਣ ਲਈ ਤੁਹਾਨੂੰ ਆਪਣਾ ਬੁਕਿੰਗ ਪੁਸ਼ਟੀ ਨੰਬਰ ਅਤੇ PHN ਚਾਹੀਦਾ ਹੋਵੇਗਾ।
ਗੈਟ ਵੈਕਸੀਨੇਟਿਡ ਵਿੱਚ ਆਪਣੀ ਸੰਪਰਕ ਜਾਣਕਾਰੀ ਸ਼ਾਮਲ ਕਰੋ ਜਾਂ ਅੱਪਡੇਟ ਕਰੋ
ਗੈਟ ਵੈਕਸੀਨੇਟਿਡ ਸਿਸਟਮ ਵਿੱਚ ਆਪਣੀ ਸੰਪਰਕ ਜਾਣਕਾਰੀ ਸ਼ਾਮਲ ਕਰੋ ਜਾਂ ਅੱਪਡੇਟ ਕਰੋ ਤਾਂ ਜੋ ਤੁਹਾਨੂੰ ਆਪਣੀਆਂ ਕੋਵਿਡ-19 ਅਤੇ ਇਨਫਲੂਐਂਜ਼ਾ ਟੀਕਾਕਰਣ ਅਪੌਇੰਟਮੈਂਟਾਂ ਬੁੱਕ ਕਰਨ ਦਾ ਸਮਾਂ ਹੋਣ 'ਤੇ ਸੂਚਨਾਵਾਂ ਮਿਲ ਸਕਣ।
ਤੁਸੀਂ ਆਪਣੀ ਜਾਂ ਕਿਸੇ ਹੋਰ ਵਿਅਕਤੀ ਦੀ ਜਾਣਕਾਰੀ ਸ਼ਾਮਲ ਜਾਂ ਅੱਪਡੇਟ ਕਰ ਸਕਦੇ ਹੋ, ਜਿਵੇਂ ਕਿ ਮਾਤਾ-ਪਿਤਾ, ਦਾਦਾ-ਦਾਦੀ/ਨਾਨਾ-ਨਾਨੀ ਜਾਂ ਬੱਚਿਆਂ ਦੀ।
ਇਨਫਲੂਐਂਜ਼ਾ ਬਾਰੇ ਜਾਣਕਾਰੀ ਲਓ
ਇਨਫਲੂਐਂਜ਼ਾ ਤੋਂ ਆਪਣੇ ਆਪ ਨੂੰ ਬਚਾਉਣ ਬਾਰੇ ਹੋਰ ਜਾਣੋ:
- ਇਨਫਲੂਐਂਜ਼ਾ ਦਾ ਮੌਸਮ
- ਇਨਫਲੂਐਂਜ਼ਾ (ਫਲੂ) ਬਾਰੇ ਤੱਥ
- ਲਾਈਵ ਐਟੇਨੂਏਟਿਡ ਇਨਫਲੂਐਂਜ਼ਾ (ਫਲੂ) ਵੈਕਸੀਨ (ਬੱਚਿਆਂ ਲਈ ਨੱਕ ਰਾਹੀਂ ਦਿੱਤਾ ਜਾਣ ਵਾਲਾ ਸਪਰੇਅ)
- ਇਨਐਕਟੀਵੇਟਿਡ ਇਨਫਲੂਐਂਜ਼ਾ (ਫਲੂ) ਵੈਕਸੀਨ
- ਬਜ਼ੁਰਗਾਂ ਨੂੰ ਇਨਐਕਟੀਵੇਟਿਡ ਇਨਫਲੂਐਂਜ਼ਾ (ਫਲੂ) ਵੈਕਸੀਨ ਕਿਉਂ ਲਗਵਾਉਣੀ ਚਾਹੀਦੀ ਹੈ
ਤੁਹਾਨੂੰ ਮਦਦ ਦੀ ਲੋੜ ਹੈ
ਆਪਣਾ ਪਰਸਨਲ ਹੈਲਥ ਨੰਬਰ (PHN) ਲੱਭੋ
‘ਮੈਡੀਕਲ ਸਰਵਿਸਿਜ਼ ਪਲਾਨ’ ਨਾਲ ਰਜਿਸਟਰ ਹੋਏ ਬੀ.ਸੀ. ਦੇ ਹਰੇਕ ਵਸਨੀਕ ਨੂੰ ਸਿਹਤ ਸੰਭਾਲ ਲਈ ਜੀਵਨ ਭਰ ਲਈ ਪਛਾਣ ਦਾ ਇੱਕ ਵਿਲੱਖਣ ਪ੍ਰਮਾਣ ਦਿੱਤਾ ਜਾਂਦਾ ਹੈ, ਜਿਸ ਨੂੰ ਪਰਸਨਲ ਹੈਲਥ ਨੰਬਰ (PHN) ਕਿਹਾ ਜਾਂਦਾ ਹੈ। ਤੁਹਾਡਾ PHN ਤੁਹਾਡੇ ਬੀ.ਸੀ. ਡਰਾਈਵਰਜ਼ ਲਾਇਸੈਂਸ, ਬੀ ਸੀ ਸਰਵਿਸਿਜ਼ ਕਾਰਡ ਜਾਂ ਕੇਅਰਕਾਰਡ ਦੇ ਪਿਛਲੇ ਪਾਸੇ ਮਿਲ ਸਕਦਾ ਹੈ।
ਤੁਹਾਡੇ ਕੋਲ ਪਰਸਨਲ ਹੈਲਥ ਨੰਬਰ (PHN) ਨਹੀਂ ਹ
ਜੇ ਤੁਸੀਂ ਸਹੀ PHN ਦਿੱਤਾ ਹੈ ਪਰ ਲੌਗ-ਇਨ ਕਰਨ ਵਿੱਚ ਸਮੱਸਿਆਵਾਂ ਆ ਰਹੀਆਂ ਹਨ, ਤਾਂ ਕਿਰਪਾ ਕਰਕੇ ਮਦਦ ਲਈ 1-833-838-2323 'ਤੇ ਕਾਲ ਸੈਂਟਰ ਨਾਲ ਸੰਪਰਕ ਕਰੋ। ਜੇ ਤੁਹਾਡੇ ਕੋਲ PHN ਨਹੀਂ ਹੈ, ਤਾਂ ਹੈਲਥ ਇਨਸ਼ੋਰੈਂਸ ਬੀ.ਸੀ. ਨੂੰ ਫ਼ੋਨ ਕਰੋ: 604-683-7151 (ਵੈਨਕੂਵਰ ਵਿੱਚ) ਜਾਂ 1-800-663-7100 (ਬੀ.ਸੀ. ਦੇ ਹੋਰ ਖੇਤਰਾਂ ਵਿੱਚ ਟੋਲ-ਫ੍ਰੀ)।
ਤੁਸੀਂ ਬੀ.ਸੀ. ਦੇ ਵਸਨੀਕ ਨਹੀਂ ਹੋ
ਕਮਿਊਨਿਟੀ ਫਾਰਮੇਸੀ ਦੇ ਫਾਰਮੇਸਿਸਟ ਸਿਰਫ਼ ਉਹਨਾਂ ਬੀ.ਸੀ. ਨਿਵਾਸੀਆਂ ਨੂੰ ਟੀਕਾ ਲਗਾ ਸਕਦੇ ਹਨ ਜਿਨ੍ਹਾਂ ਕੋਲ ਪਰਸਨਲ ਹੈਲਥ ਨੰਬਰ ਹੈ। ਬੀ.ਸੀ. ਤੋਂ ਬਾਹਰ ਰਹਿਣ ਵਾਲੇ ਲੋਕ ਵੈਕਸੀਨ ਦੀ ਅਪੌਇੰਟਮੈਂਟ ਬਾਰੇ ਜਾਣਕਾਰੀ ਲਈ ਆਪਣੇ ਸਥਾਨਕ ਪਬਲਿਕ ਹੈਲਥ ਯੂਨਿਟ ਨਾਲ ਸੰਪਰਕ ਕਰ ਸਕਦੇ ਹਨ ਜਾਂ ਸੂਬਾਈ ਵੈਕਸੀਨ ਲਾਈਨ 1-833-838-2323 (ਟੋਲ-ਫ੍ਰੀ) ’ਤੇ ਕਾਲ ਕਰ ਸਕਦੇ ਹਨ।
ਆਪਣਾ ਟੀਕਾਕਰਣ ਰਿਕਾਰਡ ਵੇਖੋ
ਤੁਸੀਂ ਹੈਲਥ ਗੇਟਵੇਅ ਰਾਹੀਂ ਆਪਣਾ ਟੀਕਾਕਰਣ ਰਿਕਾਰਡ ਔਨਲਾਈਨ ਵੇਖ ਸਕਦੇ ਹੋ।
ਜੇ ਤੁਹਾਡੇ ਟੀਕਾਕਰਣ ਦੇ ਰਿਕਾਰਡ ਹੈਲਥ ਗੇਟਵੇਅ ਵਿੱਚ ਦਿਖਾਈ ਨਹੀਂ ਦੇ ਰਹੇ, ਤਾਂ ਤੁਸੀਂ ਉਨ੍ਹਾਂ ਨੂੰ ਪ੍ਰੋਵਿੰਸ਼ੀਅਲ ਇਮਿਊਨਾਈਜ਼ੇਸ਼ਨ ਰਜਿਸਟਰੀ ਵਿੱਚ ਸ਼ਾਮਲ ਕਰ ਸਕਦੇ ਹੋ।
ਤੁਹਾਨੂੰ ਨਿੱਜੀ ਸਿਹਤ ਜਾਣਕਾਰੀ ਅਤੇ ਸਲਾਹ ਚਾਹੀਦੀ ਹੈ
ਬੀ.ਸੀ. ਵਿੱਚ ਟੀਕਾਕਰਣ ਬਾਰੇ ਜੇ ਅਜੇ ਵੀ ਤੁਹਾਡੇ ਕੋਈ ਸਵਾਲ ਹਨ, ਤਾਂ ਆਪਣੇ ਡਾਕਟਰ ਜਾਂ ਸਿਹਤ-ਸੰਭਾਲ ਪ੍ਰਦਾਨਕ ਨਾਲ ਗੱਲ ਕਰੋ।
ਜੇ ਤੁਹਾਡਾ ਕੋਈ ਫੈਮਿਲੀ ਡਾਕਟਰ ਨਹੀਂ ਹੈ, ਤਾਂ 811 ’ਤੇ ਕਾਲ ਕਰੋ।
ਜੇ ਇਨਫਲੂਐਂਜ਼ਾ ਟੀਕਾਕਰਣ ਦੇ ਆਪਣੇ ਵਿਕਲਪਾਂ ਬਾਰੇ ਤੁਹਾਡੇ ਕੋਈ ਸਵਾਲ ਹਨ ਅਤੇ ਤੁਹਾਨੂੰ ਅਪੌਇੰਟਮੈਂਟ ਦਾ ਸਮਾਂ ਬੁੱਕ ਕਰਨ ਵਿੱਚ ਮਦਦ ਦੀ ਲੋੜ ਹੈ ਤਾਂ ਕਾਲ ਸੈਂਟਰ ਨੂੰ ਫ਼ੋਨ ਕਰੋ। ਜੇ ਤੁਹਾਡੇ ਇਸ ਬਾਰੇ ਸਵਾਲ ਹਨ ਕਿ ਤੁਹਾਨੂੰ ਵੈਕਸੀਨ ਕਦੋਂ ਲੈਣੀ ਚਾਹੀਦੀ ਹੈ ਤਾਂ ਆਪਣੇ ਸਿਹਤ ਸੰਭਾਲ ਪ੍ਰਦਾਨਕ ਨਾਲ ਗੱਲ ਕਰੋ।
ਸੋਮਵਾਰ ਤੋਂ ਸ਼ੁੱਕਰਵਾਰ, ਸਵੇਰੇ 8 ਵਜੇ ਤੋਂ ਸ਼ਾਮ 6 (ਪੈਸੀਫਿਕ ਟਾਈਮ) ਵਜੇ ਤੱਕ। 17 ਅਕਤੂਬਰ ਤੋਂ 7 ਨਵੰਬਰ ਤੱਕ ਹਰ ਸ਼ਨੀਵਾਰ। ਸਟੈਟ ਛੁੱਟੀਆਂ ‘ਤੇ ਬੰਦ | ਮੁਫ਼ਤ ਬਹੁ-ਭਾਸ਼ਾਈ ਸਹਾਇਤਾ ਉਪਲਬਧ ਹੈ
ਕੈਨੇਡਾ ਅਤੇ ਅਮਰੀਕਾ ਤੋਂ ਬਾਹਰ: 1-604-681-4261
ਅੰਗਰੇਜ਼ੀ ਤੋਂ ਇਲਾਵਾ ਕਿਸੇ ਹੋਰ ਭਾਸ਼ਾ ਵਿੱਚ ਮਦਦ ਲਈ, ਕਾਲ ਕਰਨ ਵੇਲੇ ਆਪਣੀ ਭਾਸ਼ਾ ਦਾ ਨਾਮ ਦੱਸੋ। ਇਹ ਫ਼ੋਨ ਸੇਵਾ 220 ਤੋਂ ਵੱਧ ਭਾਸ਼ਾਵਾਂ ਵਿੱਚ ਮਦਦ ਮੁਹੱਈਆ ਕਰਦੀ ਹੈ, ਜਿਨ੍ਹਾਂ ਵਿੱਚ ਸ਼ਾਮਲ ਹਨ:
- 國粵語
- ਪੰਜਾਬੀ
- فارسی
- Français
- Español